28 Кулун тутар 28.03
  • -11°
  • $ 92,59
  • 100,27

Өксөкүлээх Өлөксөй арыгыны утары охсуһууга ыыппыт үлэтэ билигин да көдьүүстээх

12:00, 01 марта 2018
Текст:
Читайте нас на
Яндекс Новости
ЯДВ

А.Е. Кулаковскай-Өксөкүлээх Өлөксөй саха литературатын төрүттээччи, поэт, фольклорист, бөлүһүөк быһыытынан биллэр. Итини таһынан кини арыгыны утары охсуһууга элбэх үлэни ыыппыт эбит. Ол курдук,  Алексей Елисеевич норуотун туһугар ис сүрэҕиттэн долгуйар буолан, бэйэтин айымньыларыгар, холобур, «Итирик бурсуй ырыатыгар», “Арыгыга”, “Саха интеллигенциятыгар суругар”, арыгы киһи доруобуйатын буортулуурун, онтон сиэттэрэн киһи майгыта-сигилитэ алдьанарын уонна сиэрэ-майгыта, духуобунаһа кэхтэрин туһунан суруйбут.


Ити айымньыларыгар Өксөкүлээх Өлөксөй маннык диэн этэр: “Арыгы эдэрдэри кырытыннарар, күүстээхтэри кыаммат оҥорор, сырдыктары хараардар, кыраһыабайдары марбатар, уһуннары кыччатар». Чахчы да, арыгы содулун туһунан Өксөкүлээх саҕа хоһуйбут киһи баара дуу?! Кини арыгы уодаһына бүтүн норуоту эһэр кыахтааҕын оччолортон өтө көрбүтэ…

Урукку архыып докумуоннарын көрдөххө, Саха сиригэр чөл олоҕу туруорсар хамсааһын 1904 сылтан баар буолбут. Итини 1904 сыллаахха Чурапчыга сулууспалыыр таҥара үлэһитэ Авксентий Винокуров Саха сирин губернаторыгар «Чурапчытааҕы чөл олох уопсастыбатын» устаабын бигэргэтиигэ киллэрбит. Уопсастыба тэриллиэҕиттэн чөл олоҕу тарҕатыыга, арыгыны утары охсуһууга сүҥкэн үлэ барбыт.

Устаапка Өксөкүлээх Өлөксөй, учуутал Егасов, биэлсэр Борис Оковскай, биэлсэр эбээһинэһин толорооччу Бартенев, Боотуруускай быраабатын быыбардаммыт киһитэ Башарин, суруксут көмөлөһөөччүтэ Кожевин уонна Афанасий Саввин илии баттаабыттар. Уопсастыба сүрүн сыала-соруга — Чурапчыга уонна Боотурускай улууһугар арыгыны утары охсуһуу, кыамматтарга өйөбүл, үлэни буларга көмөлөһүү буолар эбит.

Онон, Саха сиригэр чөл олоҕу тарҕатыы хамсааһына 114 сыл тухары үлэлиир диэн этэр кыахтаахпыт.

Улуу убайбыт Өксөкүлээх Өлөксөй суруйбутун ааҕан, бэйэбитигэр иҥэринэн, чөл олоҕу тутуһуоҕуҥ!

Следите за самым важным и интересным в Telegram-канале и WhatsApp-группе ЯСИА
Тутаах тыллар