Кулун тутар 18 күнүгэр Саха сиригэр Крым Россияны кытта холбоһуутун күнүгэр анаммыт уопсастыбаннай тэрээһиннэр ыытыллыахтара. Олортон кэккэ тэрийээччинэн Дьокуускайга А.Е. Кулаковскай аатынан норуоттар доҕордоһууларын дьиэтэ буолар, диэн Саха Өрөспүүбүлүкэтин тас сибээстэргэ уонна норуоттар дьыалаларыгар министиэристибэтиттэн иһитиннэрдилэр.
16:00 чааска «Патриот» ыччат киинигэр «Жить во славу Отечества» патриотическай марафон саҕаланыаҕа. Тэрээһин Россия норуоттарын сомоҕолоһууларын, гражданскай эппиэтинэс уонна патриотизмы иҥэрэр сыаллаах, Россия Федерациятын суолталаах историческай событиеларын тула санаалары түмэн ыытыллар.
17:00 чаастан А.Е. Кулаковскай аатынан норуоттар доҕордоһууларын дьиэтин мрамор саалатыгар Россия норуоттарын сомоҕолоһууларын сылын чэрчитинэн ыытыллар «Россия — дьиэ кэргэн ыала» диэн Бүтүн Россиятааҕы сырдатар аахсыйа-дьыктаан буолар.
Саха Өрөспүүбүлүкэтин тас сибээстэргэ уонна норуоттар дьыалаларыгар министиэристибэтэ иһитиннэрбиттэринэн, аахсыйа-дьыктаан тиэкиһэ Россия Федерациятын президенэ Владимир Путин дойду күүһүн, биир сомоҕо буолуутун уонна сыаннастарын көрдөрөр цитаталарыттан оҥоһуллубут.
«Аахсыйа нуучча тыла судаарыстыбаны үөскэтэр тыл уонна омуктар икки ардыларынааҕы алтыһыы тылын, Россия норуоттарын тылларын киэҥник тарҕатыыга, ону тэҥэ гражданскай эйэни, сөбүлэһиини бөҕөргөтүүгэ туһуланар», – диэн биэдэмистибэҕэ бэлиэтээтилэр.
Санатан эттэххэ, кулун тутар 18 күнүгэр 2014 сыллаахха Россия бэрэсидьиэнэ Владимир Путин, Крым Өрөспүүбүлүкэтин Үрдүкү Сэбиэтин баһылыга Владимир Константинов, Крым Өрөспүүбүлүкэтин премьер-миниистирэ Сергей Аксенов уонна Севастополь куорат сэбиэтин бэрэссэдээтэлэ Алексей Чалый Россия Федерациятыгар Крым Өрөспүүбүлүкэтин ылыы уонна Россия Федерациятын састаабыгар саҥа субъектары тэрийии туһунан Россия Федерациятын уонна Крым Өрөспүүбүлүкэтин ыккардыларыгар дуогабарга илии баттаабыттара.
Саха сирин баһылыга, «Биир Ньыгыл Россия» баартыйа Саха сиринээҕи региональнай отделениетын сэкиритээрэ Айсен Николаев Судаарыстыбаннай Мунньахха (Ил Түмэн) анал туһаайыытыгар уопсастыба сиэргэ-майгыга иэһэ — оҕолору төрөөбүт дойдуга таптал, бэринии сөптөөх сыаннастардаах улаатыннарыы буоларын тоһоҕолоон бэлиэтээбитэ.
«Бу сиэрдээх буолуу өрөгөйүн көрдөрөр бырааһынньык биһиэхэ дойду саҥа историятыгар эпохальнай түбэлтэни санатар. Крым олохтоохторо референдумҥа Российскай Федерация састаабыгар киириини, историческай дойдуларыгар төннүүнү туһугар турууласпыттара. Кинилэр көҥүл санаалара иһиллибитэ, сокуоннай куоластааһын түмүгүнэн дойду президенэ Владимир Владимирович Путин ыйааҕынан Крыым сувереннай уонна тутулуга суох диэн билиниллибитэ, онтон биһиги дойдубут састаабыгар киирбитэ», – диэн бэлиэтээтэ Саха сирин баһылыга Айсен Николаев.
This post was published on 17.03.2026 15:09 15:09