Субуотаҕа, балаҕан ыйын 20 күнүгэр, Дьокуускай сылын аайы ыытыллар «Кросс Нации» бүтүн Россиятааҕы сүүрүүгэ кыттыаҕа. Күрэхтэһии Малай Хатыыстаах арыы сиригэр-уотугар ыытыллыаҕа, диэн СӨ физическэй култуура уонна маассабай спорт управлениетыгар иһитиннэрэллэр.
Маассабай сүүрүүгэ Россия Федерациятын баҕалаах гражданина кыттыан сөп. Кыттааччылар саас категорияларыгар арахсыахтара:
▪ кыргыттар уонна уолаттар 2008-2010 с. р.;
▪ эр дьон уонна дьахталлар 2007 с. уонна онтон аҕа.
Ону таһынан туспа старттар буолуохтара:
күүстээх спортсменнар сүүрүүлэрэ;
салайааччылар ортолоругар сүүрүү;
доруобуйатыгар хааччахтаах дьон сүүрүүтэ.
Кыттааччылары регистрациялааһын 09:00 чаастан саҕаланыаҕа, 11:00 чааска спортсменнар стартка тахсыахтара, салгыы – салайааччылар сүүрүүлэрэ. Маассабай старт 11:50 чааска ананна. Кыайыылаахтар уонна призердар мэтээллэринэн уонна грамоталарынан наҕараадаланыахтара.
Тэрээһин дойду президенэ Владимир Путин көҕүлээһининэн 2025 сылтан олоххо киллэриллэр «Россия Спорда» федеральнайдааҕы бырагыраама сыалын-соругун толорор. Дойду быйылгы саамай улахан спортивнай событиета Улуу Кыайыы 80 сылыгар уонна Дойдуну көмүскээччи Сылыгар ананар.
