Саха сирин маркетиҥҥа уонна туризм сайдыытыгар ааҕыныстыба генеральнай дириэктэрэ Спиридон Сивцев модератордаата. «Ситиһиилээх бырайыактар холобурдарын көрөбүт. Экспертэри истэбит. Туристическай уонна култуура кииннэрин тэрийэр туһунан кэпсэтэбит. Бизнес, айар тутул, талааннаах дьон энергияларынан дьону тардар туһугар», — диэтэ кини.
Саха скульптора уонна косплеер Айаал Фёдоров, биллэр аата Just Ayaal, бэйэтин бырайыагын туһунан кэпсээтэ — сэлиилэри хайдах кээмэйдээхтэринэн үтүгүннэрэн таһаарыы туһунан.
«Косплеер быһыытынан суолбун саҕалаабытым, биллэр персонажтар көстүүмнэрин оҥорууга. Билигин бэйэбэр худуоһунньуктар, дизайнердар, иистэнньэҥнэр хамаандалара баар. Биһиги араас арт-эбийиэктэри сакааска оҥоробут. Арт-эбийиэктэр дьон болҕомтотун тардаллар уонна туристары интэриэһиргэтиигэ туһуланаллар. Билигин биһиги уон сэлии ыстаадатын оҥорор былааннаахпыт, бэйэлэрин баар киэптэринэн, Табаҕа тоҕойугар, манна Өлүөнэ муостата тутуллуохтаах», — диэтэ кини.
Хаартыска: Мария Горохова/ЯСИА
Сессияҕа атын регионтан кэлбит экспертэр туризм сайдыытыгар уопуттарын кэпсээтилэр.
