«Костер на ветру» саха киинэтэ Кореяҕа ыытыллыбыт Пусанскайдааҕы норуоттар икки ардыларынааҕы киинэ фестивалыгар уонна Канадаҕа буолбут imagineNATIVE тэрээһиҥҥэ ситиһиилээхтик кытынна.
Идэтийбит артыыстар буолбакка, көннөрү дьон киинэҕэ олус итэҕэтиилээхтик оонньообуттарын уонна дуона суох үп-харчы ороскуоттаммытын көрөөччүлэр сөхтүлэр. Сэтинньи ыйга киинэни Австралияҕа көрдөрүөхтэрэ. Ити туһунан киинэни айбыт дьон пресс-конференцияҕа кэпсээтилэр.
«Киинэ 2014 сыллаахха мин төрөөбүт дойдубар – Аммаҕа 15 күн иһигэр уһуллубута. Саҥатын-иҥэтин оҥорууга кэккэ ыарахаттар бааллара. Ол түмүгэр киинэ 2016 сыл сааһыгар бэлэм буолбута», — диэн режиссер Дмитрий Давыдов эттэ.
Киинэ продюсера Сардаана Саввина эппитинэн, киинэ Австралия Asia Pacific Screen Awards бириэмийэтин иһин куонкуруска киирбит.
«Asia Pacific Screen Awards Азия Оскарынан ааттыыллар. «Костер на ветру» 300 киинэттэн талыллынна уонна APSA Cultural Diversity Award аакка киирдэ. Күрэстэһии олус улахан», — диэтэ кини.
Ол эрээри imagineNATIVE бириискэ киинэ 6 киинэни кыайан, саха киинэтэ «Бастыҥ драматическай киинэ» аакка тиксибит.
«Манна биир да идэтийбит артыыс оонньообото. Алексей Устинов барыларын сөхтөрдө. Кини оруолун эҥкилэ суох толордо. Режиссер үлэтэ харахха тута быраҕыллар. Маннык артыыстары хантан булбуппутун бары ыйыталаһаллара. Ону биһиги Амма олохтоохторо, Дима ыаллара буолалларын эппиппитигэр олус сөхпүттэрэ», — диир продюсер.
«Оператор үлэтин, уоту-күөһү, тыаһы-ууһу, муусуканы ордук бэлиэтээтилэр. Күүстээх хамаанда үлэлээбитин хайаан да этэр наадалаах. Хамаандаҕа опертор Иван Семенов, Моисей Кардюков уонна кини муусуканан кэрэтик киэргэтиитэ, монтажер уонна дьүһүнү талааччы Петр Стручков, звукорежиссер Иннокентий Сивцев бааллара».
«Канадаҕа уонна Пусаҥҥа саха киинэтигэр суолга ураты суолта уурулларын бэлиэтээтилэр. Ол кэнниттэн саха киинэлэрин ырытан көрбүтүм чахчы оннук эбит. Сирбит-уоппут киэҥэ, нэһилиэнньэлээх пууннар тэйиччилэрэ итиниэхэ сүрүн төрүөт буолбута саарбахтаммат», — диир продюсер.
«Костер на ветру» сахалыы киинэ туһунан VARIETY сурунаалга тахсыбыт. «VARIETY – аан дойдуга биллэр-көстөр, улахан ааттаах-суоллаах киинэ туһунан суруйар таһаарыы. Онно үс киинэни бэлиэтээбиттэр. Онтон биирэ биһиэнэ. Саха киинэтигэр сыалай абзац анаммыт», — диэтэ Саввина.
This post was published on 31.10.2016 11:52 11:52