Кулун тутар 19-22 күннэригэр Будапештка (Венгрия) Токио-2020 бэлэмнэниигэ европейскай континентальнай лицензионнай турнир буолуохтааҕа. Коронавирус тарҕаныытынан буолар болдьоҕо көстө. Венгрия бырабыыталыстыбата иһитиннэрбитинэн, дойдуга бары тэрээһиннэр тохтотуллубуттар. Көһөрүүнү кырата биир ый болдьохтообуттар, диэн СИА Спорт Якутии сигэнэн суруйар.
Болгария тустууга федерациятын иһитиннэриитинэн, аан дойдутааҕы лицензионнай турнир эмиэ тохтотулунна. Манна UWW быраабылатынан континентальнай сүүмэрдээһиҥҥэ кыттыбыттар, ити эрээри лицензия ылбатахтар киирсиэхтээхтэрэ. Күрэхтэһии муус устар 30 — ыам ыйын 3 күннэригэр Софияҕа (Болгария) буолуохтааҕа. Бу эмиэ биллибэт болдьоххо уһаата.
Санатар эбит буоллахха, европейскай квалицикацияҕа Беларусия сүүмэрдэммит хамаандатын чилиэннэрэ, тустууга Саха сирин оскуолатын иитиллээччилэрэ Владислав Андреев (57 кг) уонна Ньургун Скрябин (65 кг), итиэннэ Македонияттан кыттар спортсмен Владимир Егоров (57 кг).
Тустууктар Олимпийскай турнирдара атырдьах ыйын 2-8 күннэригэр буолаллара былааннанар.
This post was published on 13.03.2020 10:39 10:39