Нерюнгри оройуонугар кистээн контрафактнай арыгыны оҥорор сыаҕы туттулар. Көҥүлэ суох бизнеһи Саха сиригэр Азербайджантан кэлбит дьон үлэлэппиттэр. СӨ ИДьМ иһитиннэрбитинэн, бутлегердар Беркакитка бас билиилэригэр гараж ылбыттар, манна араас маркалаах водканы оҥорбуттар, салгыы атыылыыр сыаллаах.
Ити эрээри толкуйдаабыттарын ситэри толорботохтор, көҥүлэ суох бизнес полицейскайдарынан тутулунна.
Сыахтан 3600 мааркаламматах испиирдээх бытыылка тутулунна, сүүстэн тахса уоннуу лиитэрэлээх испиирдээх канистра булулунна. Маны сэргэ 3000 устуука стеклотара, тыһыынчаттан тахса пластиковай пробка, этикеткалар уонна контрафакт буккуйар, кутар тэриллэр бааллара билиннэ.
Холуобунай дьыала тэрилиннэ. Фигураннарга — үс 26 уонна 27 саастаах Азербайджан Өрөспүүбүлүкэтин дьонугар — дьиэтээҕи арест оҥоһулунна. Силиэстийэ салҕанар.
This post was published on 20.01.2023 15:33 15:33