18 Тохсунньу 18.01
  • -48°
  • $ 73,82
  • 83,32

Кирэдьиит ылбакка эрэ кафе, маҕаһыын арыйыахха сөп эбит

18:29, 13 апреля 2018
Текст:

Муус устар 12-13 күннэригэр Дьокуускай куоракка СӨ атыы-эргиэн уонна общественнай аһылык үлэһиттэрин I Өрөспүүбүлүкэтээҕи форумнара буолан ааста. «Атыы-эргиэн эйгэтигэр биир кэлим судаарыстыбаннай ситим тэриллибитэ быйыл 95 сылыгар үбүлүөйдээх тэрээһиннэр сылы супту ыытыллыахтара. Форумҥа 28 улуустан 190 киһи кэлэн төгүрүк остуолларга, идэ таһымын үрдэтэр трениҥҥэ, маастар-кылааска, пленарнай сүбэ мунньахха, гипердегустацияҕа кытыннылар.


Бэйэлэрэ маҕаһыыннаах, кафелаах, рестораннаах дьон мунаахсыйар боппуруостарын ырытыстылар, саҥа сокуон ирдэбилигэр сөп түбэһэн үлэлииргэ, эргиэн үлэһиттэрин санааларын түмэн, ситиһиигэ сирдииргэ үөрэннилэр, идэлэригэр туох саҥа баарын биллилэр, биир идэлээхтэрин кытта көрсөн кэпсэттилэр», —  диэн Зоя Реева СӨ Атыы-эргиэн, бырамыысыланнай балаататын быыстапка-дьаарбаҥка тэрийиитин салайааччыта билиһиннэрдэ.

Онтон мин «Куруһаала» атыы-эргиэн киинигэр улуустан кэлбит урбаанньыттары кытта көрсөн сэһэргэстим. Мария Власова, үс оҕолоох эдэр ийэ суши астаан, ону атыылаан  Өлүөхүмэ куоракка “Пирамида” кафе, маҕаһыын арыйан, бары дьиэ кэргэнинэн үлэлииллэр.

«Үлэбэр саҥаны туттаары семинардары сэргээн иһиттим, биһиги бэйэбит кондитерскай сыахтаахпыт, пицца, роллы, гамбургер арааһын астыыбыт, эт аһы переработкалыыбыт. Кафеҕа биэс повардаахпын, уопсайа 11 үлэһиттээхпин. Үлэлээбиппит төрдүс сылыгар барда, кирэдьиит игин ылбатахпыт, бастаан дьиэбэр астыыр этим, онтон бассаапка бөлөх арыйан, сакаастарын аадырыска илдьэн биэрэн кэҥээн, сайдан иһэбит«, — диэн туохтан, хайдах саҕалаабытын кэпсээтэ.

Чурапчыттан «Маарыкчаан» потребобщество үлэһиттэрэ Фаина Попова, Арассыыйа маастар-повара Капиталина Городецкая уопсайа түөрт буолан кэлэн форумҥа кытыннылар. «Биһиги эттэн кэтилиэт, фарш, тиэптэл, ону таһынан, бурдук, кулинарнай аһы астыыбыт, дьоҕус арыы сыаҕа баар, 200-тэн тахса үлэһиттээхпит. Ол иһин, үлэ кодексатыгар туох уларыйыы баарын интэриэһиргээн иһиттибит. Бородууксуйабытын бэйэбит улууспутугар эрэ батарабыт, куоракка киллэрэ иликпит. «Байым» кафебыт, “Симиир” остолобуойбут менютун уларытан, саҥардан, аныгы олох тэтимигэр сөп түбэһиннэрэн биэриэхпитин баҕарабыт. Биһиги халбаһыынан эрэ буолбакка, куурусса этинэн пицца арааһын астыыр санаалаахпыт. Эти мохоруону кытта сииртэн тэйитэ сатыыбыт, илдьи буспут мохоруон киһи иһин үлүннэрэн кэбиһэр. Онон, 5-6 мүнүүтэттэн ордук оргутар сатаммат. Аны сыалаах эти ырҕаччы буһарбакка, сибиэһэйдии тоҥоруллубут оҕуруот аһын кытта буккуйабыт, онтубутун өр буһардахха битэмиинэ сүтэн хаалар, ол иһин ас технологиятын барытын тутуһа сатыыбыт. Дьон иһэ-үөһэ доруобай буоларын туһугар кыһаллабыт», — диэн санааларын үллэһиннилэр.

Итинник атыы-эргиэн эйгэтигэр кыраттан да саҕалаан, оннооҕор кирэдьиит ылбакка, социальнай ситимнэринэн бэйэ бородууксуйатын батаран, эбии дохуот оҥостон, ону кэҥэтэн истэххэ, дьиэ кэргэн бизнеһэ буолуон сөп.

Марианна Тыртыкова, «Саха сирэ», edersaas.ru

   

0
0
18 января 18.01
  • -48°
  • $ 73,82
  • 83,32