Маннык ааттаах тэрээһини Дьокуускай куорат Сайсары оройуонугар баар «Школьный мир» оҕо-ыччат бибилэтиэкэтэ тэрийдэ. Бибилэтиэкэ ааҕар саалатыгар куорат 20 №-дээх оскуолатын бэһис кылааһын үөрэнээччилэрэ уонна «Остуоруйа дойдута» оҕо саадын иитиллээччилэрэ кытыннылар.
Бу туһунан СИА библиотекарь Ольга Эртюкова иһитиннэрбитинэн, кырачаан ыалдьыттарга бибилэтиэкэ үлэһиттэрэ кинигэ арааһын уонна оҕолор оҥоһуктарыттан быыстапканы көрдөрбүттэр. Ааҕыы туһатын, ааҕар киһи киэҥ билиилээх буоларын быһаабыттар. Ол кэннэ үөрэнээччилэр Замира Нурова, Алеша Игнатьев, Костя Самоев Антуан де Сент-Экзюпери «Маленький принц» айымньытын дорҕоонноохтук аахпыттар. 20 №-дээх оскуола учуутала Луиза Лазарева англия тылынан хоһоон ааҕан болҕомтону тардыбыт. Остуоруйаларынан викторинаҕа үөрэнээччилэр ураты көхтөөхтүк кыттыбыттар, кумааҕынан оҥоһуктарга маастар-кылааһы сөбүлээбиттэр.
Түмүккэ, тэрийээччилэр «Билии аартыгын кинигэни кытта дабайыҥ» диэн алҕаан туран акция кыттыылаахтарыгар сертификаттары туттарбыттар. Онтон оҕо саадын иитиллээччилэрэ Любовь Федорова салалтатынан оҥорбут бараан оҥоһуктарын бэлэх ууммуттар. Тэрээһини көрбүт төрөппүттэр оҕолорбутугар бэйэбитинэн холобур буолан кинилэри кытта кинигэни ааҕыаҕыҥ, бибилэтиэкэҕэ сырытыннарыаҕыҥ, үүнэн-сайдан тахсалларыгар олук уурсуоҕуҥ диэн санааларын үллэстибиттэр.
