«S7» авиа-хампаанньа Дьокуускай-Москва хайысханан күннэтэ быһа сырыылары балаҕан ыйын 20 күнүттэн оҥоруо. Алтынньыттан ити маршрутунан дьону таһыыга «Северный ветер» авиа-хампаанньа кыттыһыа. Бу туһунан СИА «Дьокуускай» аэропордун пресс-сулууспатыгар сигэнэн суруйар.
«Москва аэропордарыттан Дьокуускайга диэри уонна төттөрү Москваҕа диэри күннэтэ сырыылары, барыллаан быһаарыынан, «Аirbus A320» көтөр аал оҥорор буолуоҕа», — диэн пресс-сулууспа суруйар.
Ону таһынан, алтынньы 4 күнүттэн Москваҕа диэри рейстэри «Северный ветер» авиа-хампаанньа эмиэ оҥорор буолуоҕа. Хампаанньа Аirbus A321 сөмөлүөттэрэ хас бэнидиэнньик, сэрэдэ уонна бээтинсэ аайы көтүөхтэрэ.
«S7» авиа-хампаанньа балаҕан ыйын 20-с күннэриттэн Владивостокка сырыытын сөргүтүө. Сөмөлүөттэр нэдиэлэҕэ иккитэ көтүөхтэрэ.
