Kerdee.ru аныгылыы «көрдөөччүнү» сурук-бичик, төрөөбүт тыл күнүгэр сүрэхтээтилэр. Сайт биир платформаҕа сахалыы тыллаах сонуннары, видеолары, телеграм-ханааллары булар кыахтаах. Ону сэргэ тылбаасчыт быһыытынан туттуллар.
Оҥорон таһаарааччылар салгыы саха тыллаах нейросеть толкуйдуур былааннаахтар, суруйар СИА. Агрегатор «Сахамедиа» хампаанньанан оҥоһулунна. Генеральнай дириэктэр солбуйааччыта Чокуур Гаврильев эппитинэн, билигин өрөспүүбүлүкэҕэ сахалыы тыланан тахсар сайт аҕыйах. Онтон сахалыы тылынан «көрдөөччү» олох да суох.
«Интернет киэҥ куйаарыгар сахалыы тылынан сонуннары булар уустук, ол иһин биһиги сайт арыйдыбыт. «Сахамедиа» генеральнай дириэктэрэ Виктор Колесов биһигини өйөөтө, онон Kerdee.ru сайт оҥоһулунна. Манна сахалыы тылынан сонуннары ааҕаҕыт. Биһиги салгыы сайдабыт», — диэтэ Чокуур Гаврильев.
Сайт оҥорооччу Станислав Ноев эппитинэн, агрегатор сонуннары «роботтар» нөҥүө хомуйар. Сахалыы клавиатурата суох дьоҥҥо, буукубалардаах кнопкалар бааллар.
«Сахамедиа» генеральнай дириэктэрэ Виктор Колесов эппитинэн, саха тылын харыстааһыҥҥа уонна ону сайыннарыыга үлэ салҕанан барар. Былааҥҥа нейросеть кытта үлэ баар, оччотугар дьиэлэргэ виртуальнай куолаһынан көмөлөһөөччүлэрдэнэбит, барыта сахалыы тылынан.
This post was published on 13.02.2023 16:01 16:01