2021 сыллаахха Кэбээйи улууһугар 1058 ыал 2332 оҕоҕо ыйдааҕы босуобуйа ылбыт. Төлөбүр уопсай суумата 23 мөлүйүөн солкуобайга тэҥнэспит. Ол туһунан улуус олохтоохторугар бырабыыталыстыбаҕа отчуотка Саха сирин Баайга-дуолга уонна сиргэ сыһыаннаһыыга миниистирэ Павел Иванов иһитиннэрдэ диэн, СИА кэпсиир.
35 ыал бастакы оҕо төрөөбүтүнэн биир кэмнээх төлөбүрү ыллылар. Төлөбүрдэр уопсай суумалара — 1,2 мөлүйүөн солкуобай. Иккис оҕо төрөөбүтүнэн, регионнааҕы ийэ хапытаалын 24 ыал ыллылар, 11 ыал ийэ хапытаалынан туһаннылар. Үһүс уонна кэнники оҕо төрөөбүтүнэн ыйдааҕы төлөбүрүнэн 205 ыал 33,7 мөл. солк. суумалаах харчыны ылбыттар. Ону тэҥэ, Кэбээйи улууһугар 155 ыал бастакы оҕо төрөөбүтүнэн ый аайы көрүллэр төлөбүрү ылбыттар, манна 21,7 мөл. солк. бараммыт.
Саха сиринээҕи ийэ хапытаалынан 26 ыал туһаммыт. Өрөспүүбүлүкэтээҕи «дьиэ кэргэн» диэн ийэ хапытаала олоххо киириэҕиттэн, 642 сертификат бэриллибит. Дьон сүрүннээн ийэ хапытаалын дьиэ-уот усулуобуйатын тупсарыыга уонна тырааныспар ылыыга туһаналлар.
Төрүөҕүттэн 16 диэри саастаах оҕолорго ыйдааҕы босуобуйаны Кэбээйи улууһугар 1058 ыал 2332 оҕотугар, уопсайа 22,8 мөл. солк. суумаҕа ылбыттар.
