Кэбээйи улууһуттан многоборец Артем Дьяконов Саха сирин эдэрдэргэ күрэхтэһиитин кыайыылааҕын аатын иккис сылын ылла. Ол туһунан ЯСИА иһитиннэрэр.
Эдэрдэр ортолоругар кыайыыга 22 спортсмен кииристэ. Артем Дьяконов күрэхтэһии бастакы күнүн кэннэ тута лидердэргэ таҕыста. Ол эрээри сүүрүү, ох саанан ытыы кэнниттэн, инники күөҥҥэ Ньурбаттан Валентин Афанасьев тахсар.
Дьяконов кинини ситэр. Хапсаҕайга Кэбээйи спортсмена утарсааччытын кытта финалга ааһар. Кинини кытта сирэй көрсүһүүгэ Дьяконов кыайыыны ситиһэр, биир баалынан хаалларар.
Кыайыылааҕы быһаарыыга кыттааччылар 110 киилэттэн тахса ыйааһыннаах кумахтаах куулу көтөҕөллөр. Афанасьев бүтэһик иннинээҕи киһинэн барар, 96 миэтэрэ көрдөрөр, түмүгэр бу көрүҥҥэ үһүс миэстэни ылар. Мэҥэ Хаҥалас улууһуттан Руслан Слепцов (130 миэтэрэ) ситиһэр. Саамай кэнникинэн Артем Дьяконов стартка тахсар, 150 миэтэрэни баһылыыр. Кини Афанасьевы уопсай таблицаҕа биир баалынан куоһарар уонна карьератыгар иккис төгүлүн Саха сирин күрэхтэһиитин кыайыылааҕа буолар. Үһүс миэстэни Руслан Слепцов ылла.
Кыргыттар ортолоругар биэс көрүҥ күрэхтэһии түмүгүнэн, Мэҥэ Хаҥалас улууһуттан Айаана Константинова кыайыыны ситистэ. Кини Кэбээйи улууһуттан Марианна Кейметинованы кыайа тутта. Күрэхтэһии боруонсатын Сунтаар улууһуттан Жанна Чалбанова ылла.
Күрэхтэһии национальнай многоборьеҕа саҥа сезону арыйда. Сэтинньи 29-30 күннэригэр Дьокуускайга өрөспүүбүлүкэ күүстээх многоборецтара Дыгын Оонньууларыгар бастакы сүүмэрдиир түһүмэҕин чэрчитинэн түмсүөхтэрэ.
This post was published on 24.10.2025 11:29 11:29