Кытай биир бас-көс “Шикань” (“Поэзия”) диэн сурунаалын эрэдээксийэтиттэн “Күрүлгэн” уус-уран сурунаал эрэдээксийэтигэр сурук кэллэ.
“Күрүлгэни” уон сыллаах үбүлүөйүнэн эҕэрдэлиир, итиэннэ быйыл сурунаал 3-c, 4-с нүөмэрдэригэр Кытайга анаммыт суруйуулар уонна улуу Мао Цзэ-дун аан бастаан “Шикань” сурунаалга 1957 сыллаахха бэчээттэммит хоһооннорун сахалыы тылбаастара тахсыбытын иһин махтанар ис хоһоонноох. Ол аан дойдуга бүтүннүү дуораһыйбыт уон аҕыс хоһоону литературовед Г.М. Васильев сахалыы 1959 сыллаахха тылбаастаабыта.
“Шикань” эрэдээксийэтэ “Күрүлгэн” сурунаалы салгыы айымньылаах доҕордуу ситими тутарга, бэйэ үлэлиир ньыматын билсэргэ ыҥырар. Манна диэн эттэххэ, аныгы кэмҥэ Арассыыйа уонна Кытай доҕордуу сыһыаннара күнтэн күн кэҥээн-дириҥээн иһэр. Ол быһыытынан дойдубут баһылыга В.В. Путин уурааҕынан 2016-2017 сыллар Арассыыйа уонна Кытай сонуну киэҥник тарҕатар эйгэлэрин алтыһыннарыы сылларынан биллэриллибиттэрэ. Саха сирин суруналыыстара ити тосхолунан боччумнаах үлэни ыыталлар.
This post was published on 30.11.2016 15:02 15:02