Мэҥэ Хаҥаластааҕы Гавриил Колесов аатынан Олонхо дьиэтин дириэктэрэ Евдокия Иванова уонна фольклор салаатын исписэлииһэ Аксинья Степанова бу күннэргэ Узбекистан өрөспүүбүлүкэтин биир дириҥ историялаах Хива куоратыгар Култуура министиэристибэтин ыҥырыытынан II-c түүр омуктар форумнарыгар, «Искусство Бахши в Новом Узбекистане» научнай практическай конференцияҕа уонна IV-с Аан дойдутааҕы «Искусство Бахши» фестивальга кыттыыны ыллылар.
Кинилэр бу тэрээһиннэр истэринэн Узбекистан Юнус Раджаби аатынан национальнай музыка уонна искусство институтун кытта бииргэ үлэлэһэргэ сөбүлэҥ түһэристилэр. Форумҥа, научнай конференцияҕа Евдокия Иванова Саха сирин Ил Дархана, Бырабыыталыстыбата олоҥхону тарҕатарга, сайыннарарга, үйэтитиигэ ыытар үлэлэрин, олоҥхоһуттары өйүүллэрин, биир кэлим Олонхо дьиэлэрин ситимин, Г.Г. Колесов аатынан Олоҥхо дьиэтин үлэтин, ону таһынан мэҥэлии олонхолооһун, түөлбэ олоҥхотун уратытын туһунан дакылаат аахта.
Бу тэрээһиннэргэ 40 араас дойдуттан норуот эпостарын ырытар учуонайдар, толорооччулар кытыннылар. IV-с «Бахши искусствота» аан дойдутааҕы фестивальга Россияттан соҕотох бэрэстэбиитэл, Саха сириттэн олоҥхоһут Н.И. Степанов — Ноорой сиэнэ, Аксиния Степанова кыттан, үһүс бочуоттаах миэстэҕэ тигистэ уонна Сахатын сирин, төрөөбүт Мэҥэ Хаҥалас улууһун ааттарын үрдүк таһымҥа таһаарда.
Субу курдук саха олоҥхотун толоруу төрүт үгэһин илдьэ сылдьар удьуор утумун салҕааччыны Анисия Степанованы күннээх Узбекистаҥҥа бастыҥнар кэккэлэригэр киирбитинэн эҕэрдэлиибит.
Түмүктээн эттэххэ, Евдокия Иванова салайан үлэлэтэр Гавриил Колесов аатын дьоһуннаахтык сүгэр Олоҥхо дьиэтэ өрөспүүбүлүкэ тас өттүгэр уопут атастаһыыга биир бастыҥ холбурунан буолар.
Евдокия Николаевна Алтай, Калмыкия, Башкирия, Казахстан, Киргизия эпостарын толорооччуларын, тарҕатааччыларын, чинчийээччилэрин кытта ыкса ситимнээхтик, киэҥ далааһыннаахтык үлэлиирэ биллэр. Быйыл саха Олоҥхото ЮНЕСКО испиэһэгэр киирбит үбүлүөйдээх 20 сылыгар бу ситиһиилэр дьоһун бэлиэ буолан, норуот историятыгар хаалыахтара диэн бигэ эрэнэбит.
Ааптар: Анфиса Слепцова, РФ суруналыыстарын сойууһун чилиэнэ.
This post was published on 30.04.2025 17:09 17:09