Өрөспүүбүлүкэ сибээскэ уонна иһитиннэрэр технологияларга министиэристибэтин уонна тус бэйэм ааппыттан сибээс бары салааларын үлэһиттэрин идэлээх бырааһынньыкпытынан – Араадьыйа күнүнэн эҕэрдэлиибин!
Бүгүн иһитиннэрэр-көрдөрөр технологиялар уонна телекоммуникациялар дойдубут, өрөспүүбүлүкэ сайдыыларыгар стратегическай суолталаахтар, олох уйгутун үрдэтэн, саҥа кыахтары арыйан, ырааҕы да чугаһатан, киһи олоҕун бары эйгэлэрэ тиһиктээхтик үлэлииллэрин хаччыйаллар.
Бу бырааһынньык күн сибээс салаатын, араадьыйа бары үлэһиттэригэр уонна бэтэрээннэригэр таһаарыылаах үлэҕит уонна идэҕитигэр бэриниигит иһин махтанабын. Бүгүн биһиги иннибитигэр турар сүрүн соруктартан биирдэстэринэн иһитиннэрэр-көрдөрөр уопсастыбаны тэрийии, өрөспүүбүлүкэ бары олохтоохторугар ханна олороллоруттан тутулуга суох цифровой уонна иһитиннэрии өттүнэн хааччыйыы тэҥ буоларын олохтооһун буолар. Кэнники сылларга бу хайысхаҕа кырата суох үлэ ыытылынна – өрөспүүбүлүкэҕэ алта тыһыынча килэмиэтир кэриҥэ сибээс волоконнай-оптическай ситимэ тардылынна, өрөспүүбүлүкэ олохтоохторун 95 быр. босхо цифровой теле-араадьыйанан туһанар кыаҕы биэрэр цифровой теле-араадьыйанан биэрии эбийиэктэрин тутуу түмүктэннэ. Биһиги үлэҕэ көхтөөх уонна идэлэрин дэгиттэр баһылаабыт үлэһиттэрбит көмөлөрүнэн кэлэр өттүгэр ситиһиллибити хаҥатар уонна бөҕөргөтөр кыахтаныахпыт диэн бүк эрэнэбин.
Эһиэхэ уонна чугас дьоҥҥутугар чэгиэн доруобуйаны, нус-хас олоҕу, идэҕитигэр ситиһиилэри баҕарабын!
Александр Борисов, СӨ сибээскэ уонна иһитиннэрэр технологияларга миниистирэ.
