Дьиэ сүөһүтүнэн хайдах күн-дьыл буоларын билгэлииллэрин туһунан истибиккит дуо? Ол туһунан Саха сирэ саайт суруйда.
- Ынах моонньун уһата-уһата муннун тыал хоту тутан олооруҥнаатаҕына, сотору былыттаах, ардахтаах күннэр кэлэллэр диэн этэллэр эбит.
- Ынахтар ардах кэлэригэр ааньа иэппэттэр, бэл аанньа аһаабаттар, уулаабаттар, күлүк сири былдьаһаллар, үүттэрэ ыаҕаска күүгэннирэн түһэр.
- Күһүн маҥнайгы хаар түстэҕин сарсыардатыгар тиэргэннэриттэн тэйбэккэ эрэ, улаханнык маҥырыыр, айманар буоллахтарына, саҥа түспүт хаар ууллубат, кыстык хаар кэлэр.
- Саас хаар түспүт сарсыардатыгар ынахтар аймалҕана суох мэччирэҥнэригэр бардахтарына, түспүт хаар уһаабат, күнүс эрдэттэн ууллар.
* Кырдьаҕастар ытынан уонна куосканан эмиэ билгэлээччилэр. Ол курдук:
- Ыт атаҕын чиккэччи тэбинэн ойоҕоһунан сыттаҕына, сотору кэминэн ардах дуу, хаар дуу кэлэрин бэлиэтииллэр.
- Ыт кыһыҥҥы түүн мээнэ улуйдаҕына, тымныы түһэр.
- Ыт сайынын куйаас күҥҥэ хонууга күөлэһийдэҕинэ, ардах, оттон кыһынын хаарга күөлэһийдэҕинэ, хаар кэлэр.
- Ыт түүрүллэн баран сыттаҕына, халлаан тымныйар. Тымныыга түүтүн быттаннаҕына, сотору кэминэн халлаан итийэр, былыттанар.
- Ыттаах куоска кыһын былыт буоларыгар утуйан тахсаллар. Куоска кураан күн буоларыгар атаҕын саланар, сирэйин суунар идэлэнэр. Тымныы чугаһаатаҕына, оһох үрдүгэр тахсан утуйа мээрик буолар. Тыал түһүө эрэ буоллар, муостаны тыҥыраҕынан тарбыыр. Кыһын ириэһин кэлэригэр наар утуйан тахсар.
Саха ыалын халандаарыттан, «Айар», 2026 с.
This post was published on 16.03.2026 12:03 12:03