43-с театральнай дьылга “Күн Боотур” куукуланан дьүһүйүллэн турбут испэктээк бэрт элбэх оскуолаларга уонна уһуйааннарга көһүннэ. Бу оҕо испэктээгин туруорарга Саха Өрөспүүбүлүкэтин норуодунай, Арассыыйа үтүөлээх артыыһа Дмитрий Артемьев бэйэтин баҕатын биллэрбитэ.
Дмитрий Артемьев “Дьулуруйар Ньургун Боотур» уонна «Бэрт Хара» олоҥхолорго олоҕуран тыйаатыр фольклор салаатын артыыстарын хомуйан, оруоллары түҥэтэн, худуоһунньук Светлана Андросоваҕа куукулалары эскиистэтэн, тиктэрэн-оҥотторон, барытын сааһылаан, таҥан таһаарбыта. Алын кылаас оҕолоро уонна уһуйаан иитээччилэрэ, сахалыы саҥарар оҕолор бэрт сэргэхтик олоҥхону, ырыаны-тойугу, үҥкүүнү-битиини сөбүлээн көрөллөр.
Холобур, ыам ыйын 19 күнүгэр Дьокуускай куорат 3-с нүөмэрдээх оскуолатын 3-с, 2-с кылааһын үөрэнээччилэрэ артыыстары алгыстаах алаадьынан көрсөн күндүлээтилэр. Оҕолор испэктээги бэрт сэргэхтик интириэһиргээн көрдүлэр, сэргээтилэр, дьоруойдары кытары тэҥҥэ буоллулар, араас-араас сырыыларын болҕойон көрдүлэр-иһиттилэр. Бүтэһигэр туран орто дойду бухатыырдара аллараа дойду адьарайдарын үүрбүттэригэр, бука бары үөрүүлэриттэн ытыс таһыннылар уонна үгэс курдук туран артыыстары кытары оһуокайдаатылар.
Сүрүн оруоллары испэктээккэ толордулар — Олоҥхоһут, Сорук Боллур – Дмитрий Артемьев, Күн Боотур, Эрчим Бэргэн – Аан дойдутааҕы күрэс дипломана – Александр Карманов, Айталы Куо, Айыы Умсуур Удаҕан, Кыыс Кыскыйдаан – Бүтүн Арассыыйатааҕы уонна Аан дойдутааҕы күрэс лауреата Василена Шарина, Арсан Дуолай — Бүтүн Арассыыйатааҕы уонна Аан дойдутааҕы күрэс лауреата Георгий Слепцов-Чаҕылхан.
Бу оскуолаҕа төрөөбүт тыл сүмэтин, төрөөбүт дорҕоону, ырыаны-тойугу, олоҥхону, үҥкүүнү-битиини оҕолорго билиһиннэрэллэрэ, үөрэтэллэрэ кэрэхсэбиллээх, инникилээх, улахан суолталаах үлэ.
Ааптар: Вера Черноградская
