Дьокуускай куорат дьаһалтатын култуураҕа уонна духуобунас сайдыытыгар управлениетын уокуруктааҕы норуот айымньытын киинин «Тускул» КК сылын аайы ыытыллар «Көмүс кынат» диэн ааттаах тэрээһиҥҥэ анал ааттары туттарыы буолла. «Махталлаах буолуу, сиэрдээх буолуу» диэн үйэтитиигэ тиэрдэргэ быстыспат өйдөбүллэр. Этэргэ дылы, хайгыыр тылы хармааҥҥа хаайбакка, сэргиир тылы сиэпкэ саһыарбакка, кэрэхсиир тылы кэтэҕириин ороҥҥо кистээбэккэ кэмигэр, миэстэтигэр эттэххэ үтүө, үчүгэй үмүөрүһүө, кэрэ кэккэлэһиэ, сэргэх сэргэстэһиэ, айар-тутар аартык ааннара арыллан иһиэхтэрэ турдаҕа.
Тэрээһин 2015 сылтан сылын аайы ыытыллар буолан, дьон-сэргэ сэргээһинин, кэрэхсэбилин ылыан ылбыт. Быйылгы сылга кимнээх ааттара доргуччу ааттанна, хабыллар ытыс тыаһынан доҕуһуолланна?!
Олохпут сайдыыта-үүнүүтэ, хардыыта хайа да хайысхата урут да билигин даҕаны үтүө санаалаах, меценат дьон баар буолан, байытыллар, кэҥиир, тэнийэр. Бүддьүөт үбэ-харчыта иннэ-кэннэ биллэрэ кистэл буолбатах, онон ойоҕостон көмө, тирэх буолуу олох солбуллубат хартыыната. Ол курдук биһиги, хатастар, норуот хаһаайыстыбатын хайа баҕарар салаатыгар көмө-тирэх оҥостор, эрэнэр дьонноохпут, тэрилтэлэрдээхпит.
«Бастыҥ меценат» — «Прогресс» ХЭХ (салайааччы Пинигин А.С). «Прогресс» оруобуна 10 сыл анараа өттүгэр тэриллэн, сүрүннээн тутуунан дьарыктанар. Үлэлэрин чэрчитинэн өрөспүүбүлүкэ улуустарын нэһилиэктэригэр, киин сирдэригэр оҕо уһуйааннарын, дьон олорор дьиэлэрин туталлар. Бу тэрилтэ үлэһиттэрин тумус туттар сыаллара-соруктара – үлэ ситиһиигэ туһуламмыта буолар. Сүрүн үлэлэрин таһынан үтүө дьыаланан күүскэ дьарыктаналлар. Аҥаардас быйылгы сылга 9 мөл солк аадырыстаммыт көмө, спонсорскай көмө оҥоһуллубут. Манна даҕатан эттэххэ, “Прогресс” ХЭХ кэккэ сылларга «Дыгын оонньуутун» сүрүн спонсора буоларын бары да билэбит, кэлэр 2023 ол суума бу тэрилтэ былааныгар баарын туһунан этиллибитэ. Бу саха норуота, чуолаан эдэр ыччат дьоммут чөл олоҕу, чэгиэн туругу тутуһалларыгар төһүү күүстэртэн биирдэстэрэ буолар. Ону таһынан Хатаска буолар уопсастыбаннай олох хамсааһына бу тэрилтэ көмөтө суох буолбат.
«Төлкөлөөх өйөбүл» — Төрөөбүт тылбыт сүөгэйин, сүмэтин эҕирийбит, ийэ тылбыт иһирэх иэйиитин иҥэриммит, ойуулуур тыл бастыҥа киирбит, тохтообокко тохтор толуу, сайыннарар өттүгэр салайар, сайаҕас, сайдам тыллаах, туллубат тулааһыннаах, хамсаабат акылааттаах, өһүллүбэт өһүөлээх тыллаах, омук дьонуттан уратыбыт — олоҥхолоохпутун 2022 сыл дьиҥ чахчы илэ-бааччы көрөн итэҕэйдибит, итэҕэттибит. Олоҥхону туруоруу манан аҕай буолбатах дьыала буоларын бары да өйдүүбүт, онон манна көмө-тирэх, сүбэ-соргу буолбут Мария Васильевна Турантаева салайыытынан үлэлиир -хамсыыр «Олоҥхо театра» бу ааты ылла.
«Бастыҥ таһаарыылаах үлэ» — Кэлиҥҥи сылларга кимиилээхтик киирсэн, ыксары ылсан, састаабын хаҥаппыт, уруккуну умнубакка билиҥҥилиин алтыһыннарар Хатастааҕы норуот театра (өрөсүссүөр Семенова Е.Е) быйылгы да сылга туран хаалбата, «Олоҥхо олохпут ситимэ» бырагыраама баҕа санаа үрдэлэ, кылаан чыпчаала буолбут олоҥхону сценаҕа таһаарда.
«Бастыҥ таһаарыылаах үлэ» — 2019 сыллаахха өрөспүүбүлүкэ үрдүнэн норуот талааннахтарын сомоҕо күүс оҥорор, түмэр сыаллаах олус таһаарыылаахтык үлэлиир «Симэх» норуот ускуустубатын киинэ «Тускул» КК иһинэн үлэлиир иистэнньэҥнэри, уустары, туойдьуттары уо.д.а кииннээн «Хатастааҕы норуот уус уран оҥоһугун дьиэтэ» (салайааччы Жиркова Т.Г, уус-уран салайааччы Константинова В.М) тэрилтэни арыйан кииннээн, үлэлиэҕиттэн биллэр-көстөр хамсааһын, сайдыы -үүнүү, кэҥээһин — дириҥээһин барда. 2022 сылга нэһилиэк таһымыттан саҕалаан, Арассыыйаны ааһан, аан дойду таһымнаах улахан көрүүлэргэ, күрэхтэргэ, бэстибээллэргэ үрдүк үрдэллэргэ үктэммит талба талааннаах дьоммут Хатаспытын ааттаттылар.
«Ситиһиигэ сирдээччи» — Ханнык баҕарар үлэ-хамнас, үөрэх — сайдыы көҕүлээччилээх, өйүүр — өйдүүр дьонноох буоллаҕына тахсыылаах, үтүө түмүктэрдээх буолара биллэр суол. Бу чааһыгар «Тускул» КК урут да билигин да табыллыбыт дьон буолабыт. Үөһээ этиллибитин курдук «Хатастааҕы норуот уус-уран оҥоһугун дьиэтэ» 2019 сыллаахха үлэлэммит үлэни үрдүктүк сыаналааһын түмүгэр, инникигэ эрэллээх арыллыбыта. Ол күнтэн ыла кылгас кэм иһигэр киэҥ эйгэҕэ тахсыыга суолбутун-ииспитин үлэбит хайысхаларын сааһылаан биэрэн, уопсай улахан былааҥҥа киириигэ сүрүн күүс буолбут, кырдьыга да, ситиһиигэ сирдээччи буолбут Я.В.Игнатьева салайааччылаах «Симэх» норуот айымньытын киинин махталбыт бэлиэтин бу номинацияны анаатыбыт.
«Өйөбүл» — Өйөбүл диэн саха тылын быһаарыылаах тылдьытыгар суруллубутунан, биир сүрүн өйдөбүлэ көмө-көмөлөһүү, тирээ, тирээбиллээ диэн. Дьэ кырдьыга да оннук өйөбүл буолар дьоммут биһиэхэ куруутун көмө, тирээбил буоллахтара. Түмсүүлээх, сомоҕолоһуулаах буолуу төрдө өйөбүлгэ сыттаҕа… Өйөбүл диэн анал ааты
1) Хатас нэһилиэгин олохтоох дьаһалтата — салайааччы Пермяков Евгений Петрович. Манна Дьокуускай куорат дьаһалтатын култуураҕа уонна духуобунас сайдыытыгар управлениетын уокуруктааҕы норуот айымньытын киинин дириэктэрин солбуйааччы Ушницкая Ньургуйаана Егоровна бэлиэтээн-тоһоҕолоон эппитин курдук ханна олохтоох дьаһалта өйөбүл, көмө — тирэх буолар, онно олох хайа баҕарар хайысхатыгар ситиһии ситимнээх буолар. Бу биһиэхэ хатастарга куруутун баар суол буоларыттан үөрэбит, киэн туттабыт.
2) П.Н. уонна Н.Е. Самсоновтар ааттарынан Хатас орто оскуолата (салайааччы Слепцов Николай Владимирович) нэһилиэкпит тумус туттар бастыҥтан бастыҥ тэрилтэтэ. Санаан көрүҥ, олоҥхону туруорууга 120 киһи кыттыбыт буоллаҕына, онтон 40 Хатас оскуолатын үлэһитэ!. Маны таһынан сылы быһа ыытыллар араас элбэх, эгэлгэ тэрээһиммитигэр кыра, улахан диэбэккэ барытыгар көхтөөх кыттыыны ылааччы эмиэ оскуолабыт.
3) Хатастааҕы оҕо ускуустубаларын оскуолата (салайааччы Лемешева Христина Николаевна) быйылгы 2023 сылга тэриллибитэ 45 сыла буолар тоҥолох тоҥолохтон тутуһан, сарын сарынтан өйөнсөр тэрилтэбит баар буолан ускуустуба хайа да хайысхатыгар күүстээх нэһилиэкпит — ырыа буоллун, үҥкүү буоллун, уруһуй буоллун, норуот музыкальнай үнүстүрүмүөннэрэ да буоллун, баян, фортепиано да буоллун. Кэлиҥҥи сылларга норуодунай театры кытта олох ыкса ылсан тыыннаах дорҕоон доҕуһуоллаах испэктээктэр туруталаатылар.
4) «Ситим» айымньытын дьиэтэ (Стручкова Саргылана Тарасовна). Ааттыын айымньы дьиэтигэр сүрэхтиин-дууһалыын, эттиин-хаанныын айымньылаах дьон манна баар. Аны ол сатабылларын, дьоҕурдарын үөрүүнү кытта үллэстэр, көмөлөһөр, тирэх, өйөбүл буолар дьоммут эмиэ кинилэр.
5) №70 «Кэрэчээнэ» уһуйаан (салайааччы Николаева Галина Семеновна) сылын ахсын улаатар кэҥиир нэһилиэкпит кэнчээри ыччатын иитэр-үөрэтэр өрөспүүбүлүкэ таһымыгар инники күөҥҥэ сылдьар бырайыактардаах, көрдөрүүлэрдээх Хатаспытын ааттатар үтүөкэн тэрилтэбитин кытта ыкса сибээстээх үлэлиир буоламмыт, көлүөнэбит ситимэ үс саастаах оҕолортон буолуутун оҥкулун оҥорор дьоммут кинилэр. Аны кэлэктиип үлэһиттэрэ олус көхтөөхтөр, дьоҕурдаахтар, талааннаахтар уонна айар-тутар үлэҕэ баҕалаахтар.
6) Захаров Алексей Константинович — Өрөспүүбүлүкэтээҕи норуот айымньытын дьиэтин норуот айымньытын салаатын сэбиэдиссэйэ, норуодунай театрдарга куратор — «Тускул» КК ыытар киэҥ хабааннаах үлэтин бары өттүгэр олус көмөлөөх, театр үлэтигэр-хамнаһыгар хардыытыгар, бырайыактар хамсааһыннарыгар, күрэхтэр, көрүүлэр киэҥ эйгэҕэ тахсыыларыгар төһүү күүс буолар дьоһун киһибит.
7) Слепцов Петр Иванович — «Арчы дьиэтэ» духуобунас киинин исписэлииһэ — Дьокуускай куорат дьаһалтатын култуураҕа уонна духуобунас сайдыытыгар управлениетын уокуруктааҕы норуот айымньытын киинин иһинэн үлэлиир 16 кэлэктиип бары биир ыал оҕолорун курдук иллээхтик-эйэлээхтик айабыт — тутабыт. Бэйэ бэйэбитигэр көмөлөсүһэн, этэргэ дылы, ылсан-бэрсэн, ситэрсэн олоробут. Биир дойдулаахпыт Петр Иванович эйэҕэс-сайаҕас, турбут-олорбут сэргэх эргиччи дьоҕур — талаан киһи, кыаҕа-күүһэ, бириэмэтэ баарынан биһиги бырайыактарбытыгар, санаабыппытын олоххо киллэриигэ куруутун көмөлөһөр.
«Бастыҥ бырайыак» — Бырайыак ааптара «Тускул» КК фольклорга исписэлииһэ Ларионова Колымана Васильевна. Улуу киһибит С.А.Зверев суруйан хаалларбыт «Кулун кугас аттаах Куллустай Бэргэн» олоҥхону туруоруу курдук улахан сыалы соругу ылынан ону кыайа-хото тутан буспут-хаппыт, сиппит-хоппут исписэлиис буоларын көрдөрөдө. Бу бырайыак өссө биир талааны күлүмүрдэтэ оонньотон «Саҥа аат» анал ааты Күөрэгэй Корякина ылбыта эмиэ бу бырайыак биир кылаан кырыыта диэтэххэ омун буолбат.
«Олоҥхо олохпут ситимэ» — 2008 сылтан тохтоло суох үлэлээн үтүө түмүктэрдээх, түмсүүлээх-сомоҕолоһуулах буолууну төрүттээһиҥҥэ олук уурбут бырайыак ааптардара СӨ култууратын үтүөлээх үлэһиттэрэ Людмила Михайловна Чепалова, Старкова Вера Никитична айбыттара-туппуттара элбэх. Бу бырайыак бастакы түһүмэхтэрин ааһан,билигин даҕаны олоххо тоҕоостооҕун толору дакаастаан өссө кэҥээн-дириҥээн иһэр. Онон ытыктыыр дьоммут инникини, кэскиллээҕи түстээбиттэрэ барыбытын да сөхтөрөр уонна убаастатар.
«Кэрэ эйгэ кэрэһитэ» — Саргылана Васильевна Григорьева — СӨ култууратын туйгуна, А.Макарова аатынан КК «Күн өркөн» бириэмийэтин лауреата, Хатас норуодунай театрын сүрүн артыыскаларыттан биирдэстэрэ, Хатастааҕы оҕо искусствотын оскуолатын фольклорга уһуйааччыта бу аакка бары өттүттэн сөптөөх. Эргиччи дэгиттэр талааннаах, куруутун кэрэҕэ-үтүөҕэ тардыһыылаах , кэлэр ыччаты дьиҥ чахчы сахалыы өйгө-санааҕа иитэр-үөрэтэр дьоммутуттан биирдэстэрэ кини буолар. Театрга сүрэҕинэн — дууһатынан ыалдьар, сөбүлүүр-таптыыр, ураты көрүүлээх-истиилээх уонна бу эйгэҕэ чугас анал үөрэхтээх убаастыыр киһибит көмөтө, сүбэтэ — соргута үгүс — элбэх. Аны бэриллибит оруол уобараһыгар, хас биирдии тылыгар-өһүгэр, суругун бэлиэтигэр тиийэ сыһыана артыыстарга бэйэтэ туһугар маастар кылаас буоллаҕа.
«Махтал» — СӨ култууратын туйгуна, Хатастааҕы оҕо ускуустубаларын оскуолата фортепиано кылааһын учуутала, «Сайдам» вокальнай ансаамбыл төрүттээччитэ — көмөтө, тирэх буолуута Хатаска ырыа сайдыытыгар, эйгэтэ кэҥииригэр улахан. Ол курдук «Ыллыыр оҕо саас» куонкуруспут дьүүллүүр сүбэтин солбуллубат чилиэнэ, саҥа технологиялары киллэриигэ куруутун инники күөҥҥэ сылдьар. «Тускул» КК кинигэ таһаарар салаатын кытта ыкса ылсан үлэлээн А.Т.Семенова үлэтин уопутун үйэтитиигэ-тарҕатыыга дьоһун кылаатын киллэрбитэ.
«Бастыҥ айар кэлэктиип» — Хатас норуодунай театра салайааччы СӨ култууратын туйгуна Семенова Евдокия Ефимовна — 2022-2023 айар тутар сезон Евдокия Ефимовнаҕа бэлэх-туһах тутан туран үлэтигэр-хамнаһыгар улахан ситиһиилэри, кыайыылары-хотуулары аҕалла. Биллэн туран ол кини ситимнээх үлэтиттэн, сылтан сыл ситэн-хотон испит маастарыстыбатыттан, буһуу-хатыы оскуолатын ааспыт сылларыттан быһаччы сибээстээх. Бу айар сыл кини икки төгүл 25 сылы бэлиэтиир — култуура эйгэтигэр үктэммитэ 25 сыла, Хатас норуодунай театра айбыта-туппута 25 сыла. Үйэ чиэппэрин тухары тохтоло суох үлэлээн кэлбит театр артыыстарыгар сүгүрүйүүбүт бэлиэтин бастыҥ айар салайааччы кэлэктиибэ бастыҥ буолбутунан эҕэрдэлээн туран театрбыт артыыстарыгар култуураҕа бэриниилээхтэригэр, эрэллээхтэригэр махтанан туран маннык аат ананна.
«Сырдык сыдьаайа» — кэрэ кэрэһиттэригэр, үтүөнү, үчүгэйи үксэтээччилэргэ, дьиэ-кэргэнинэн бэриниилээхтик, бу сыллар тухары умсугуйан туран дириҥ хорутуулаахтык үлэлээбит, үлэлии сылдьар, үлэлиэхтээх СӨ култууратын үтүөлээх үлэһиттэригэр дьоһун ыалга Лариса Егоровна Бурцеваҕа, Хуухээ Балдоржка.
«Төрүт иис кистэлэ» — СӨ тыатын хаһаайыстыбатын туйгуна, Хата нэһилиэгин норуотун маастара, «Ситим» айымньы дьиэтин уһуйааччыта — Анастасия Ивановна Алексеева буолла. Бу түгэҥҥэ бу үрдүк сценаҕа эмиэ да үөрэ-көтө, эмиэ долгуйа талаан норуокка баар диэн кынаттаах этии мээнэҕэ буолбатаҕын чаҕылхай туоһута Анастасия Ивановна Алексеева таҕыста. Анастасия Ивановна утум удьуор суолун тутуһан, өбүгэ үгэһин үйэтитэн,ирдэһэн туран иистэнэн, эккирэтиһэн туран тигэн, умсугуйан туран уран уйаҕас дууһаҥ аанын аһан,көлүөнэ ситимин ситиитин киэргэлэ – оҕолорго кэккэлэһиннэрэ олордон кэрэхсэтэн көрүөхтэн кэрэни,сэргэстэһэ олорон сэргэҕи айан-тутан таһаарар. Кини үлэлэрэ сиигэ тэҥинэн, ойуутун өҥө-дьүһүнэ табыгастаах дьүөрэлэһиитинэн, дириҥ ис хоһоонунан уратылаахтар. Дьиҥ сахалыы айылҕа өҥүн табан туһанар уонна туттар матырыйааллара эмиэ барыта айылҕаттан ылыллыбыт буолар. Манна кыбытык да тигии, тимиринэн, оҕуруонан киэргэтии, кылынан өрөн да оҥоруу, аппликация даҕаны бааллар. Оҕолор бу эйгэни сөбүлээн, умсугуйан туран дьарыктаналлара киһини үөрдэр. Анастасия Ивановна этэринэн уһуйуллааччы уһуйааччыттан, уһуйааччы уһуйуллааччытыттан билии, сатабыл бэрсэннэр бэйэни ситэрсии, эпсиһии, байытыһыы түгэннэрэ аҕыйаҕа суохтар.
«Талба талаан» — Колачев Анатолий Петрович — Орто дойдуга бэлэх буолан бэриллибит олоҕу түөс толору тыынан бэриллибит талааны-дьоҕуру олоҕуҥ хайа да кэрчик кэмигэр сайыннаран, үүннэрэн олоххун киэргэтиэххин, дьону — сэргэни үөрдүөххүн-көтүтүөххүн сөп. Ол Анатолий Петрович олоҕор дьиҥ чахчы баар. 2022 сайын «Тускул» КК камернай саалатыгар ини бии Колачевтар кэнсиэрдэрэ сэргэхтик этэргэ дылы олох биир тыынынан ааспыта. Онно өскөтүн Афанасий анал култуура үөрэхтээх уонна уопсайынан даҕаны олоҕо култуураны кытта ыкса сибээстээх эбит буоллаҕына Анатолий бу кэнники кэккэ 3-4 сылларга диэри сымнаҕастык эттэххэ чугаһа суох атын эйгэҕэ, үлэҕэ-хамнаска сырыттаҕа… Дьэ онтон биир түгэнтэн, биир киэһэттэн төлө көтөн тахсыбыт дууһа иэйиитэ көҥүлбүн ыллым ээ диирдии киэҥ эйгэҕэ тахсыбыта. Онтон ыла ылбаҕай ырыа, айар-тутар олох салгына, долгуна Анатолийы кулууп дьиэ уораҕайыгар аҕалбыта. Киинэҕэ да оонньоото, театрга да араас хабааннаах оруоллары ситиһиилээхтик арыйда, араас күрэхтэргэ, көрүүлэргэ ситиһиилээхтик кытынна. Били И.Луковцев ырыатын ханалытан эттэххэ Анатолий диэн киһи да киһи дэттэ.
«Дьүөрэл» — Лазарева Октябрина Афанасьевна «Тускул» КК биир таһаарыылаах үлэлээх «Бары уруһуйдуубут» түмсүүтэ Өрөспүүбүлүкэтээҕи норуот айымньытын дьиэтэ сылын аайы ыытыллар бастыҥ түмсүүлэргэ «Ситиһии» диэн күрэҕин кыайыылааҕа буолар. Октябрина Афанасьевна бу түмсүү саамай маҥнайгы чилиэннэриттэн биирдэстэрэ. Өр сыл сүрэҕэр – дууһатыгар иитийэхтии сылдьыбыт баҕа санаатын хайдах саҕалыыбын дии саныы сырыттаҕына оруобуна баҕалаахтар кэлиҥ диэн ыҥырыыны көрөн кэлбитэ. Ис иһиттэн хайдах эрэ иһиллии сылдьардыы уу чуумпу, налыы-намыын туруктаах, нарын-намчы, кэрэ сэбэрэлээх Октябрина Афанасьевна кэлэригэр чуолкай ылыммыт былааннаах, барыллардаах этэ. Сүрдээх болҕомтолоох, кыраҕы харахтаах, бэйэтэ туспа көрүүлээх буолан дьоһун үлэлэри суруйда. Кинини атыттартан уратыта наһаа ымпыктаан-чымпыктаан, киистэтинэн кыраасканы хас биирдии ууруутугар тиийэ толкуйдаан үлэлиир. Бэрт сотору дьиҥ бэйэтин толкуйунан таһаарбыт хартыыналарын суруйан барбыта. Уруһуйу таһынан баайыынан, тигиинэн дьарыктанар, былырыыҥҥаттан “Хатастыына” түмсүүгэ сылдьар дьүөгэлэрин уруһуйга уһуйар. Ис сүрэҕэр, дууһатыгар баары өҥү-дьүһүнү кытта дьүөрэлээн дьүөрэл диэн туругу таһаарбыт талааннаах киһибит буолар.
«Тирэх» — Яковлев Мичил Степанович, Павлова Светлана Иванован, Скрябин Вадим Михайлович Бу ааты хаартыскаҕа түһэрии, күлүм түгэни үйэтитии маастардара — фотографтар, бу эйгэҕэ биллэр ааттар-суоллар ылыахтарын ыллылар. Кэлиҥҥи сылларга онлайн диэн ааттанан куйаар нөҥүө үлэбит биир саамай киэҥ кэрэхсэбили ылбыт хайысхата хаартыскананараас тиэмэҕэ күрэхтэр. Онно бу ааттамыт дьон тус бэйэлэрин бириэмэлэрин биэрэн туран этэргэ дылы күннэри-түүннэри үлэлээн кэллилэр.
«Дайар кынат» — Киэҥ нэлэмэн сахабыт сирин көрөөччүлэрин куттарын-сүрдэрин туппут «Мин таптыыр спутнигым» сериал уонна «Күн кыыһа Күннэй» уус-уран киинэ сулуһа Күннэй Константинова ылыан ылла. Саха дьонун сиэринэн оҕобутун сэмэйдик эҕэрдэлиибит. Доруобуйаны, ситиһиилэри баҕарабыт.
«Тускул» КК ситимнээх үлэтин түмүгүнэн биһиэхэ сылдьыбыт, кэлбит дьон сааһыттан, олохторун хайа да кэмнэриттэн тутулуга суох куруутун сибээһи туталлар, мэлдьи бааллар. Ол туоһулара «Бэриниилээх буолуу» — Андрей Саввин, «Эрэл» — Альбина Мордовская буолаллар. Кинилэр оҕо эрдэхтэриттэн култуура эйгэтигэр сылдьан куйааска буспуттара, тымныыттан толлубатахтара, ардахтан-хаартан иҥнибэтэхтэрэ — ыһыахтар, куорат күннэрэ, бэстибээллэр, күрэхтэр, көрүүлэр… 2022 сылга даҕаны кинилэр биһигини кытта бииргэлэр. Ырыа ылбаҕай эйгэтин кэҥэппит оҕо дьон чугдаар куоластарын иһитиннэрэн, сыл устата 26 араас куонкуруска, күрэххэ кытыннаран, Хатаспыт аатын кыайыылаахтар ахсааннарыгар ааттаппыт «Көмүс дорҕоон» түмсүү — салайааччы Татьяна Окорокова түмсүүтэ «Үрдэл» диэн анал ааты ылла.
Ааспыт сылы түмүктээтибит, саҥа сылга үктэннибит. Анал ааттары убаастанар, ытыктанар дьоммут туттартаатылар — СӨ норуодунай артыыһа Г.С.Васильев, салайааччыларбыт Дьокуускай куорат дьаһалтатын култуураҕа уонна духуобунас сайдыытыгар управлениетын салайааччытын солбуйааччы А.В. Каженкина, уокуруктааҕы норуот айымньытын киинин дириэктэрин солбуйааччы Ушницкая Н.Е, «Симэх» норуот айымньытын кииниттэн Капустина А. К, Саха НКИХ сериалларын сулууспатын өрөсүссүөрэ Е.Эверстова үөрүүнү үрдэттилэр, сүрэҕи долгуттулар.
Наталья Руфова. Хатас
