Алтынньы 9-11 күннэригэр Владикавказка көҥүл тустууга Россия чемпионата ыытыллыаҕа. Күрэхтэһии түмүгүнэн Белградка (Сербия) буолуохтаах Аан дойду чемпионатыгар национальнай сүүмэрдэммит хамаанда талыллыаҕа, sportyakutia.ru суруйар. Өрөспүүбүлүкэ сүүмэрдэммит хамаандатын кылаабынай тренерэ Александр Оконешников хамаанда бэлэмнэниитин уонна Саха сирин сүүмэрдэммит хамаандатын саҥа хапытаанын аатын эттэ — Арыйаан Тютрин.
“Тустууктарга бүтэһик күрэхтэһии олунньуга ыытыллыбыта. Нерюнгрига Уһук Илин чемпионата буолбута. Тохтобул кэмигэр тулуурдаах буолууга уонна күүс эбиитигэр тренировкалар ыытылыннылар. «Физикаҕа» уонна «взрывной күүскэ» үлэлээтибит. Исписэлиистэр көмөлөстүлэр.
Сыл аҥара — улахан болдьох. Спортсменнар күрэхтэһиилэри аҕыннылар. Көбүөргэ тахса охсуохха баҕа күүһүрдэ, бу сорохторго көрдөрүүлэрин тупсарыыларыгар стимул биэрдэ. Чемпионакка саамай кылаабынайа – туруоруллубут соругу толорон, үчүгэй түмүгү ситиһии”, – диэтэ Александр Оконешников.
Хамаанда лидера уларыйда. Сайыҥҥы түмсүүлэр кэмнэригэр биир тэҥ быһаарыынан саҥа хапытаан талыллынна. Норуоттар икки ардыларынааҕы кылаастаах спорт маастара, Европа, Россия чемпионатын призера, Аан дойду Кубогын хаһаайына, норуоттар икки ардыларынааҕы күрэхтэһиилэр хас да төгүллээх кыайыылаахтара Арыйаан Тютрин ааттанна. Онон Виктор Рассадины кини солбуйар буолла.
