29 Бэс ыйа 29.06
  • -7°
  • $ 104,68
  • 115,6

Үҥкүү күнэ Хамаҕаттаҕа сылын аайы ыытыллар буолуоҕа

Нам улууһун Хамаҕаттатыгар үҥкүүнү өрө тутан, саҥалыы тыыннаан, үрдүкү кэрдиискэ таһаарбыт киһинэн Любовь Андросова буолар. Биир дойдулаахтара кининэн киэн туттабыт. Утум салҕанар. Быйылгыттан саҕалаан, «Үҥкүү күнэ» нэһилиэккэ сылын аайы тэриллиэҕэ.

Норуоттар икки ардыларынааҕы үҥкүү күнүн чэрчитинэн, Хамаҕаттаҕа муус устар бүтэһик күнүгэр «Үҥкүү – Аан дойду барыта өйдүүр тыла» тэрээһин буолла. «Түһүлгэ» норуот айымньытын киинэ урукку, билиҥҥи сылларга үҥкүүнү өрө туппуттары бииргэ муста, сомоҕолоото. Үҥкүү дьоро киэһэтин Любовь Алексеевна үөрэнээччитэ, улууска классическай үҥкүүнү киллэрбит дьонтон биирдэстэрэ Октябрина Ивановна кыра кыргыттарынаан сүрүн хамсаныылары көрдөрөн арыйдылар.

«Үҥкүү – Аан дойду барыта өйдүүр тыла» дьоро киэһэҕэ Любовь Андросова, Октябрина Попова, Саргылана Кудрина, Оксана Кудрина, Римма Татаринова, Евгения Корчанова, Василина Канаева, Алексей Дьячковскай, Анастасия Сивцева туруорбут үҥкүүлэрэ бары тэҥинэн дьон көрүүтүгэр таҕыстылар. Тэрээһини «Ретро-Данс» народнай коллектив киэргэттэ. Саамай үөрүүлээҕэ, А.Д. Макарова аатынан Дьокуускайдааҕы култуура уонна искусство колледжын устудьуона, Хамаҕатта кыыһа Ангелина Караваева 2 — 4 куурус 22 устудьуонун таһааран, бэйэтэ туруорбут үҥкүүтүн биир дойдулаахтарыгар бэлэхтээтэ. «Үҥкүүнү таларга, таптыырга сирдээбит учууталым Октябрина Ивановна үгүскэ үөрэппитэ, төһүү күүс буолбута. Бу сыллар устата туохха үөрэммиппин биир дойдулаахтарбар көрдөрө кэллим», – диэн Ангелина санаатын үллэстэр.

Нэһилиэккэ үҥкүү күнэ аан маҥнайгытын ыытыллыбытын «Түһүлгэ» НАК директора Антонина Харитонова этэр. «Үҥкүү күнэ Хамаҕаттабытыгар аны сылын аайы ыытыллар үтүө үгэскэ кубулуйуоҕа», – диэн Антонина Алексеевна чопчулуур.

Любовь Алексеевна эрэлин түһэн биэрбэтэх, кини суолун салҕаан, дойдутугар ситиһиилэри аҕалбыт бүгүҥҥү бастыҥ үҥкүүгэ уһуйааччынан Октябрина Попова буолар. Айар куттаахтар кистэлэҥнэрин арыйыылара, киһиттэн-киһиэхэ салгыы утумнатан таһымнаах үлэни быспакка салҕаан биэриилэрэ – бу буолара буолуо, дьиҥ чахчы уһуйааччы ситиһиитэ, киэн туттуута. Ис дьиҥин учуутал уонна үөрэнээччи бэйэлэрэ билэн эрдэхтэрэ. Манна сыһыары туттахха, Любовь Андросова арыйбыт үҥкүү оскуолатыгар «Радуга» диэн ааты-суолу иҥэрбитин, саҥа киһи Октябрина Попова атын аатынан солбуйбакка, туора соппокко илдьэ сылдьара, уларыта туппатаҕа — кинилэр чугас сыһыаннарыгар олоҕурар дии саныыбын. Иитэн-үөрэтэн таһаарбыт учууталгын хаһан даҕаны туора сотума!

Ааптар: Харысхан Попов, Нам улууһа

Следите за самым важным и интересным в Telegram-канале и WhatsApp-группе ЯСИА
0
0