19 Тохсунньу 19.01
  • -48°
  • $ 73,82
  • 83,32

Өймөкөөҥҥө сылгыны иитии уонна Аграрнай салааларын учуонайдар салайаллар

15:11, 12 апреля 2018
Текст:

Өймөкөөн Томторугар “Тоноор” племенной хаһаайыстыба базатыгар сылгыһыттары үөрэтэр киини арыйыыга уонна сылгыны үөрдээн иитиигэ саҥа ньымалары туһаныы туһунан кэпсэтиигэ тиийэ сылдьан, “Туймаада” ҮХАПХ генеральнай дириэктэрин бастакы солбуйааччы Алексей Захаров хампаанньа аатыттан Өймөкөөн улууһун баһылыга Михаил Захаровтыын 2018 сылга бииргэ үлэлэһии сөбүлэһиитигэр илии баттаста.


Ону сэргэ хампаанньа генеральнай дириэктэрин солбуйааччы, СӨ бааһынай хаһаайыстыбаларын уонна кэпэрэтииптэрин ассоциациятын бэрэсидьиэнэ Александр Артемьев Өймөкөөҥҥө АККОР улуустааҕы салаатын арыйарга кэпсэттэ. Тымныы оройунан аатырар хотугу улууска маннык тэриллии эрдэ суоҕа, бу уопсастыбаннай үлэни улуустааҕы тыа хаһаайыстыбатын управлениетын салайааччыта Павел Сивцев бэйэтэ сүрүннүөҕэ.

Манна таарыйа Россия Аграрнай партиятын (РАП) кэккэтигэр чилиэннэри ылыы туһунан боппуруос көтөҕүллүбүтүгэр “Тоноор” ТХПК бэрэссэдээтэлэ, учуонай-сылгыһыт Николай Винокуров: “Хаан-уруу партиябытыгар хайаан даҕаны киирэбин”, — диэн мунньах кыттыылаахтарыттан биир маҥнайгынан тылланна уонна улуус сылгыһыттарыгар ыҥырыы таһааран, түмэ тардыах буолан эрэннэрдэ. Аграрнай партия Өймөкөөн улууһунааҕы салаатын эдэр фермер, тыа хаһаайыстыбатын наукатыгар хандьыдаат Андрей Винокуров салайыаҕа. Александр Еремеевич Андрей Андреевичка РАП чилиэнэ буоларын туоһулуур докумуону бастакынан туттарда.

“Туймаада” ҮХАПХ генеральнай дириэктэрин көмөлөһөөччүтэ, РАП сэбиэтин чилиэнэ, СӨ үтүөлээх зоотехнига Олег Марков: “Тоноор” сылгылара сайын күөххэ көҥүл көччүйэн баран, кыстыкка саҥардыы киирбит курдук эмис-тот көрүҥнээхтэр. Кыра-улахан сылгы барыта биир кэм үчүгэй туруктаахтар. Николай Тимофеевич сылгыларын улаханнык аһаппат, мэччирэҥнээх сиргэ хастаран аһатар. Хаар ууллан, сир харааран тахсан истэҕин аайы өртөөн кэбиһэр эбит. Төрөөбүт биэлэри туспа хаайан хастарар, көрөн аһатар. Муус устар ортотуттан ыам ыйын ортотугар диэри төрүүллэрин курдук дьаһанар. Эрдэ көҕүйбүт биэни атыырга холбообот, эрдэ буоллаҕына, иккис көҕүйүүтүн аһаран баран биирдэ холбуур итиэннэ биэлэр наар биир атыырга сылдьалларын болҕомтоҕо ылан, атыыр үөрүн сиэлин биир гына кырыйан бэлиэтиир эбит. Төрүөх кэмигэр күннэри-түүннэри дьуһуурустуба олохтуур. Онон төрүүр биэ көлүттүбэтин, кулунчук ийэтин уоһаҕын иһэрин, үс чаас иһигэр куртаҕа үлэлээн, саахтыырын ситиһэллэр”, — диэн тугу көрбүтүн-истибитин кэпсээтэ.

Тыа хаһаайыстыбатын министиэристибэтэ “Тоноор” ТХПК базатыгар сылгыһыттары үөрэтэр киини тутарга быһаарбыта түбэһиэхчэ буолбатах. Хаһаайыстыба кулун төрүөҕүн тыыннаахтыы ылыыны 90, улахан сылгыны чөл иитиини 100 бырыһыан ситиһэр.   Н.Т.Винокуров сааһыран баран, Дьааҥы сылгытын иитэр-чинчийэр үөрүйэҕэр олоҕуран, үлэ көмүскээн, тыа хаһаайыстыбатын наукатыгар хандьыдаат буолбута. СӨ норуотун хаһаайыстыбатын үтүөлээх үлэһитэ, РФ уонна СӨ тыатын хаһаайыстыбатын үтүөлээх үлэһитэ, СӨ тыа хаһаайыстыбатыгар Судаарыстыбаннай бириэмийэтин лауреата. Николай Тимофеевич аны баай уопутун, сылгыны үөрдээн иитиигэ ураты технологиялаах ньыматын үрдүк үөрэхтээх, туйах хатарар уолаттарын Андрей уонна Алексей Винокуровтары кытта өрөспүүбүлүкэ эдэр сылгыһыттарыгар иҥэриэ.

Василий НИКИФОРОВ, «Саха сирэ» хаһыат, edersaas.ru

0
0
19 января 19.01
  • -48°
  • $ 73,82
  • 83,32