Өймөкөөн улууһугар 120-тэн тахса тиэргэҥҥэ уу киирэн, 70-ча дьиэ ууга барда. Орто Балаҕан, Куйдуһун, Биэрэк Үрдэ, Өймөкөөн сэлиэнньэлэрэ уонна Уус-Ньараҕа биир түөлбэ ууга барар кутталлаахтар. Бу туһунан бүгүн, от ыйын 16 күнүгэр, СӨ гражданскай оборуона дьыалаларыгар уонна нэһилиэнньэ олоҕор куттал суоһаабатын хааччыйар миниистир Дмитрий Лепчиков иһитиннэрдэ.
Бу сарсыардааҥҥы дааннайдарынан, Өймөкөөн сэлиэнньэтигэр түөрт чаас иһигэр уу таһыма 14 см үрдээн 564 см буолан, кутталлаах кирбиини 1 м курдук ааста.
«Халаан хамсааһына салгыы Муома оройуонунан ааһыаҕа. Суһал дааннайдарынан, Хонуу сэлиэнньэтигэр уу таһыма 637 см буолбут, түөрт чаас иһигэр 11 см үрдээбит. Балаһыанньаны хонтуруоллуубут, үлэлиибит», — диир миниистир.
Өймөкөөн улууһугар быыһааччылар суһал бөлөхтөрө айаннаата, суруйда Саха сирэ саайт.
