Элбэх оҕолоох ийэ «Үйэ оҕолоро» тус сыаллаах хапытаал төлөбүрүн салҕыыр туһунан этиитин Саха сирин баһылыга балаҕан ыйын 26 күнүгэр өйөөтө. Түмүктүүр быһаарыыны регион салалтатын мунньаҕын кэнниттэн ылыныахтара, — диэн СИА кэпсиир.
«Быйыл 8400-тэн тахса оҕо төрөөтө. Биһиги төһө да ыарахаттар баалларын үрдүнэн, Саха сирин олохтооҕо мөлүйүөнү куоһараары сылдьар. Тус сыаллаах хапытаалга бары улахан интэриэстээхтэр. Элбэх киһи бу үбү инникитин оҕолор туһаналларыгар уурунар, сорох өттө тырааныспар ыаларга, олорор дьиэ усулуобуйатын тупсарарга туһанар. Мин бу туһунан бииргэ үлэлиир дьоммун кытары сүбэлэһиэм. Биллэн турар, өйүөхпүн баҕарабын», — диэтэ Айсен Николаев.
Санатан эттэххэ, Айсен Николаев 2022 сыл тохсунньу 1 күнүттэн ахсынньы 31-гэр диэри өрөспүүбүлүкэ сиригэр-уотугар олорор дьиэ кэргэттэр оҕолоннохторуна эбэтэр иитэ оҕону ыллахтарына, 100 тыһыынча солкуобайдаах «Үйэ оҕолоро тус сыаллаах хапытаалы биэрэр туһунан уураахха илии баттаабыта.
This post was published on 27.09.2022 10:03 10:03