24 От ыйа 24.07
  • 28°
  • $ 87,3
  • 95,46

Изабелла Адамова ааптарыскай сэминээрэ

11:35, 06 мая 2018
Текст:
Читайте нас на
Яндекс Новости
ЯДВ

Быйылгы үөрэх дьылыгар Чурапчытааҕы “Кэскил” уһуйаан иитээччилэрэ, иитиллээччилэрэ улууска, өрөспүүбүлүкэҕэ ыытыллар араас дьаһалларга көхтөөхтүк уонна ситиһиилээхтик кытталлар.

Биир сүрүн, олус эппиэтинэстээх тэрээһининэн, 12-с сылын «Кэскил» уһуйааҥҥа кырачааннары үҥкүү кэрэ эйгэтигэр уһуйар «Үрүмэччи» үҥкүү устуудьуйатын салайааччыта  Изабелла Адамова улуус уһуйааннарын хореографтарыгар анаан «Үрүмэччи» устуудьуйа оҕо үҥкүүлүүр дьоҕурун сайыннарыыга оруола» диэн бэйэтин ааптарыскай сэминээр-практикумун ыыппыта буолла.

Тэрээһин бастакы чааһа Изабелла Аркадьевна толоруутугар араас омуктар үҥкүүлэриттэн турбут  «Попурри»-нан сэргэхтик аһылынна. Норуоттар икки ардыларынааҕы бэстибээллэр хас да төгүллээх лауреаттара «Үрүмэччи» үҥкүү устуудьуйатын оҕолоро, уһуйаан үлэһиттэрэ чаҕылхай үҥкүүлэринэн эҕэрдэлээтилэр. Сэминээр иккис чааһыгар аһаҕас дьарык ыытылынна. Үлэ уопутун презентацията, үҥкүү сүрүн хамсаныыларын, этюдтары, сюжеттаах-оруоллаах үҥкүүлэри туруорууга маастар-кылаас ыытылынна. Сэминээр кыттыылаахтара воркшоп – айар мастарыскыайга үлэлээтилэр. Манна биир идэлээхтэр бөлөхтөрүнэн арахсан, сүбэлэһэн, араас үҥкүүлэри туруорууга, көстүүмнэри толкуйдааһыҥҥа бырайыак оҥорон көмүскээтилэр.

«Кэскил» уһуйаан оҕолоро  устуудьуйаҕа  үҥкүүлүүр дьоҕурдарын сайыннараллар

Түмүккэ улуус уһуйааннарын хореографтара сэминээр үрдүк таһымҥа барыытынан астыммыттарын, үгүс саҥаны-сонуну билбиттэрин, элбэххэ үөрэммиттэрин туһунан санааларын атастастылар. Инникитин сибээстэрин бөҕөргөтөргө, бииргэ үлэлииргэ этии киллэрдилэр. Одьулуун нэһилиэгин «Күнчээн» уһуйаан музыкальнай салайааччыта Ирина Дьяконова  истиҥ иһирэх тылларынан балтылара Валерия уонна Амелия Татариновалар, «Кэскил» уһуйаан выпускниктара, чуолаан бу «Үрүмэччи» үҥкүү устуудьуйатыгар дьарыктананнар, кинилэри кыра эрдэхтэринэ дьоҕурдарын таба көрөн сайыннаран таһаарбытыгар Изабелла Аркадьевнаҕа аймахтар ааттарыттан махталын биллэрдэ. Билигин Амелия А., Н. Посельскаялар ааттарынан Дьокуускайдааҕы балетнай оскуолаҕа, Валерия улуустааҕы А.П.Гоголев аатынан оҕо искусствотын оскуолатыгар ситиһиилээхтик үөрэнэ сылдьаллар.

«Үрүмэччи» үҥкүү устуудьуйата кыһыҥҥы фестивальга эмиэ лауреат буолбута

Сэминээргэ улуус үөрэҕин салаатыттан Оксана Игнатьева кыттыыны ылла, Изабелла Аркадьевнаҕа үөрэх салаатын наҕараадатын туттарда, оҕону кэрэ эйгэтигэр уһуйааччыларга ситиһиилэри баҕарда.

Устуудьуйа иитиллээччилэрэ сэминээргэ көхтөөх кыттыыны ыллылар

Аан дойду үрдүнэн бэлиэтэнэр Үҥкүү күнүн чэрчитинэн ыытыллыбыт бу ааптарыскай сэминээр сыалын-соругун ситистэ, улуус уһуйааннарын хореографтарыгар инники соруктары туруорда, саҥаны-сонуну киллэрдэ.

Татьяна АФАНАСЬЕВА, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА