Ил Түмэн дьокутаата, «Якутскэнерго» генеральнай дириэктэрэ Гаврил Алексеев СӨ Бырабыыталыстыбатын Бэрэссэдээтэлэ Кирилл Бычков салайааччылаах Бырабыыталыстыба хамыыһыйатыгар киирэн, Абый улууһугар тиийэ сырытта. Онтон салгыы Өймөкөөҥҥө көтүөхтээх этилэр даҕаны халлаан туругуттан риэйсэни сарсыҥҥыга көһөрбүттэр, суруйда Саха парламент саайт.
Онон Абый улууһун Кэбэргэнэ нэһилиэгэр сылдьан халаан уутуттан эмсэҕэлээбит дьиэлэри уонна суолу-ииһи көрбүттэр. Нэһилиэнньэни кытта көрсүһүү кэмигэр чөлүгэр түһэрии үлэтин уонна дьоҥҥо көмөнү оҥоруу боппуруостарын дьүүллэстилэр.
Өймөкөөн улууһугар халаан уута улахан хоромньуну таһаарда, онон кылгас кэм иһигэр ититэр ситими, энергетика эбийиэктэрин чөлүгэр түһэрэн, кыстыкка бэлэмнэнии үлэтин ыытыахтаахтар. Төһө даҕаны айылҕа алдьархайа кэтэспэтэх өртүттэн ааҥнаабытын иһин, уоту биэрии тохтообото.
Бырабыыталыстыба хамыыһыйата салгыы Өймөкөөн улууһугар Сордоҥноох, Куйдуһун, Томтор, Өймөкөөн нэһилиэктэргэ сылдьан үлэлээтэ, тахсыбыт хоромньу кээмэйин сыаналаатылар.
Өймөкөөн нэһилиэгэр ууттан босхоломмут дьиэлэри, ол иһигэр Биэрэк Үрдэ, Хара Тумул учаастактары көрдүлэр, олохтоохтору кытта көрүстүлэр, оробуочай мунньах ыыттылар.
Уопсай сүбэнэн дьиэни-уоту чөлүгэр түһэриэхтэрэ, тыа хаһаайыстыбата улахан болҕомтону эрэйэр. Ититэр сезон саҕаланыар диэри баара-суоҕа биир эрэ ый хаалла, онон алдьаммыт ититэр ситими, компенсаторы, ЛЭП опоратын оҥорорго улахан үлэ ыытыллыахтаах.
Айылҕа алдьархайыттан «Теплоэнергосервис», «Сахаэнерго» үлэһиттэрин 50-ча дьиэ кэргэттэрэ эмсэҕэлээбиттэр, онон биир идэлээхтэригэр энергетиктар харчынан көмөлөһүөхтэрэ.
Гаврил Алексеев Өймөкөөҥҥө, Муомаҕа, Абыйга буолбут халаан уутун кэнниттэн чөлүгэр түһэрии үлэтин туһунан Ил Түмэн дьокутааттарын кытта көрсөн кэпсэттэ. Халаан уута туохтан буолбутун чинчийиэхтэрэ, үөрэтиэхтэрэ, инникитин маннык быһыы-майгы хатыламматын туһугар миэрэ ылыахтара. Норуот дьокутааттара халаан уутуттан эмсэҕэлээбит нэһилиэнньэҕэ, тэрилтэлэргэ, муниципалитеттарга көмөлөһөллөр.
Хаартыска Гаврил Алексеев ТГ-ханаалыттан.
This post was published on 11.08.2025 17:16 17:16