Билиҥҥи аҕа уонна орто саастаах дьон Өктөөп өрөгөйүн дирбийэн-дарбыйан, урукку Сэбиэскэй Сойууһу бүтүннүү хабан киэҥник, бар дьон сүргэтин көтөҕөрдүү өрө күүрүүлээхтик ыытылларын үчүгэйдик өйдүүллэр.
Өктөөппүт ол бэйэтэ кэрдиис кэм бэлиэ оҥкулларыгар оҕустаран, 1996 сыллаахха Эйэлэһии уонна Сөбүлэһии күнүгэр уларыппыттара. Онтон, 2004 сыл балаҕан ыйыгар, Россия религиялар икки ардыларынааҕы сэбиэтэ сэтинньи 4 күнүн бырааһынньык күнүнэн билинэргэ уонна Норуоттар сомоҕолоһууларын күнүн быһыытынан бэлиэтииргэ этии киллэрэллэр. Ити кэмтэн ылата ити күн (эргэ истиилинэн алтынньы 22 күнүгэр) 1612 сыллаахха земскэй ыстаарыста Кузьма Минин уонна кинээс Дмитрий Пожарскай дьону-сэргэни түмэн, сэрииһиттэри (ополчение) тэрийэн, Москваны Польша интервеннэриттэн босхолообут күннэрэ бэлиэтэнэр.
Даҕатан эттэххэ, оччотооҕу кэмҥэ ити кыайыыларыгар Айыы таҥара бэйэтинэн көмөлөстө дии саныыллара суруллар. Ити кэннэ Иван Грознай өлүөҕүттэн саҕаламмыт былаас былдьаһан хайдыһыы, бутуурдаах олох оннун булбута. Кэрдиис кэмтэн биллэринэн, ыраахтааҕы Алексей Федорович Романов 1649 сыллаахха Норуот сомоҕолоһуутун күнүн олохтообута Москва босхоломмут күнүн быһыытынан сэбиэскэй былаас буолуор диэри бэлиэтэммит. Эргэ истиилинэн алтынньы 25 күнүгэр буолбут Улуу Өктөөптөөҕү социалистическай өрөбөлүүссүйэни сэтинньи сэттиһигэр киэҥник бэлиэтиир этибит.
Хомуньууһуму тутар туһугар турууласпыт дьиҥнээх хомуньуустар кэккэлэрэ чарааһаатаҕын ахсын, хомойуох иһин, Өктөөп өйдөбүлэ өлбөөрөн, өлбөөдүйэн иһэр. Ордук Cэтинньи 7 күнүгэр Өктөөп өрөгөйө өрөгөйдүү, бэлиэтэнэ сылдьыбытын, чуолаан, кэлиҥҥи сүһүөх дьон умна быһыытыйда. Маны таһынан, аҕыс сыллааҕыта Улуу Өктөөбүрдээҕи социалистическай өрөбөлүүссүйэ 100 сыллаах өрөгөй бэлиэтэ суолтатыгар эрэ тэриллэн ааспыта диэн дьон кэпсиир.
Билиҥҥи хоммуньуустар салалталарын өттүттэн ыытыллар үлэлэригэр күттүөннээх хамсаныы баара көстүбэт курдук. Мээнэ көрсөн, тыл этэн, бэлэх-туһах туттарсан баран, тарҕаһаллар.
Билигин орто саастаах дьон кимнээҕэр ордук үтүөтүк саныыллар ити кэмнэри, оҕо саастара, эдэр саастара ааспыт кэрэ кэмнэрин. Ким да оччотооҕу олох ыараханын санаабат, ас-таҥас тиийбэтин, бэрт уһун кэритиинэн сэдэх аска, таҥаска тиксэллэрин о.д.а. Ол оннугар алын үөрэх сүһүөҕэр октябренок, онтон пионер уонна хомсомуол буола сылдьыбыттарынан олус киэн тутталлар.
Ленин өйүк санаата, Улуу Өктөөп өрөгөйдөөх күнэ хаһан да дьон-сэргэ ортотугар умнуллуо суоҕа! Өрөгөйдөөх Өктөөп күнүнэн! Туругурун!!!
Ааптар: Пркопий Пестерев, Дьокуускай
This post was published on 07.11.2025 12:22 12:22