“Иркутскайдааҕы ньиэп хампаанньата” ХЭТ 2018 сылга Мирнэй оройуонун социальнай-экономическай сайдыытыгар уонна аҕа ууһун общиналарын өйүүргэ 3,45 мөл солкуобайы ыытыаҕа.
Бу хампаанньа тулалыыр эйгэни харыстааһыҥҥа сөптөөх бэлиитикэни ыытар. Сүрүн болҕомтотун олохтоох нэһилиэнньэни өйөөһүҥҥэ уурар. Маны Мирнэй оройуонун кытта түһэрсибит сөбүлэһиилэрэ туоһулуур. Мирнэй оройуонун баһылыга Ришат Юзмухаметов уонна Иркутскайдааҕы ньиэп хампаанньата кулун тутар ыйга бииргэ үлэлээһиҥҥэ эбии сөбүлэһиини түһэрсибиттэрэ. Дуогабар 2013 с. түһэрсиллибитэ.
2018 сылга хампаанньа оройуон сайдыытыгар уонна аҕа ууһун общиналарыгар 3,45 мөлүйүөн солкуобайынан көмөлөһүөҕэ. Хампаанньа быйыл хас биирдиилэригэр 250-нуу тыһыынча солкуобайы “Ботуобуйа”, “Сокукаан”, “Туой Хайа”, “Ыал”, “Джункун” уонна “Чуона” аҕа ууһун общиналарыгар биэриэҕэ. Ити уопсайа 1,5 мөл солк. Өссө 1,95 мөл Мирнэй оройуонун сайдыытыгар көрүллэр.
Юлия Ходулова, СИА.
