Дьон олорор дьиэлээх-уоттаах буоларын хааччыйыыга баар механизымнар хайдах быһыылаахтык үлэлииллэрин миниистирдэр кабинеттара хаттаан көрөргө бэлэмин туһунан өрөспүүбүлүкэ баһылыга Егор Борисов эттэ. Кини кредит бырагыраамата дьоҥҥо төһө кыаллымтыатын ырытарга регион дьаһалтатыгар сорудахтаата.
Өрөспүүбүлүкэтээҕи тутуу министиэристибэтэ иһитиннэрбитинэн, олорор дьиэни тутууга 2016 сылга 27 млрд солк. көрүллүбүт. Маныаха 14,3 млрд солк. нэһилиэнньэттэн хомуйарга былааннаммыт. 8,2 млрд – кредит үбэ-харчыта, 6,1 млрд — дьон тус харчыта. Ол эбэтэр, олорор дьиэни ыларга кредитинэн туһаныы 30% дьон төһө төлүүр кыахтааҕыттан быһаччы тутулуктаах. Оттон дьон биир үксүн ипотека кредитигэр киирэн, дьиэни тутууга кыттыһар.
Итини барытын аахсан туран, ипотека бырагырааматыгар нэһилиэнньэ төһө бырыһыана кыттар кыахтааҕын, онно дьон төһө дохуоттаах буолары сөптөөҕүнэн ааҕарын регион бырабыыталыстыбата чуолкайдык быһаарыахтаах. Ити туһунан Егор Борисов чиҥэтэн эттэ.
«Итинник ырытыы түмүгэр дьон-сэргэ төһөтө ипотека бырагырааматыгар кыттар уонна уопсайынан атыылаһар кыахтааҕын дьэҥкэтик билиэх тустаахпыт. Өскөтүн кинилэр атыылаһар кыахтара кычччыыр түбэлтэтигэр 2017-2018 сылларга олорор дьиэни тутуу уонна үлэҕэ киллэрии былаанын көннөрөн, уларытан биэриэхпит. Атыылаһар кыах үрдүк буоллаҕына, тутууну элбэтиэхпит», — диэтэ кини.
Регионнааҕы бааннар дааннайдарыгар көстөрүнэн, ипотекаҕа кыттыан сөптөөх дьиэ кэргэн дохуота 60-80 тыһ. солк. тэҥнэһиэхтээх. Оттон өрөспүүбүлүкэҕэ орто хамнас 50-55 тыһ.солк. Дойдуга бүтүннүүтүгэр сабардаан турар кириисис дьон-сэргэ атыылаһар кыаҕын биллэ атахтыыр.
«Муниципальнай бырагыраамалары ылан сирийэн ырыттахха, коммерческай уонна судаарыстыба өйөбүлүнэн туһанар бааннартан бюджет эйгэтин үлэһиттэрэ кредити ылаллара аччаан иһэр. Онон 2017-2018 сылларга квартираны ипотека нөҥүө атыылаһыы ыарахан буолуон сөп», — диэн баар сабаҕалааһыны куорат мээрэ Айсен Николаев бигэргэттэ.
2016 сылга олорор дьиэни тутууга уонна үлэҕэ киллэриигэ анаммыт мунньахха ипотека бырагыраамата төһө кыаллымтыатын ырытарга Егор Борисов эттэ. Онно олоҕуран сыл бастакы аҥаарыгар судаарыстыба өйөбүлэ көннөрүллүөҕэ, чуолкайданыаҕа.
«Дьон үп-харчы ресурсатын ылар кыаҕа хайдаҕын билиэхтээхпит. Өскөтүн бюджет улахана суох өйөбүлүн таһынан ноҕорууска улахан ирээтэ гражданнарга сүктэриллэр буоллаҕына, тутуһар хайысхабытын уларытыахтаахпыт. Онуоха бюджет эйгэтин үлэһиттэригэр туспа бырагырааманы киллэрэн биэриэхпит. Оннук гымматахха, кэлэр сылларга олорор дьиэ бырагырааматын үбүлээһиҥҥэ кыһалҕалар үөскүөхтэрин сөп», – диэн Егор Борисов мунньах кыттыылаахтарыгар туһаайан эттэ.
