Уопсай түмүгүнэн, I Интеллектуальнай оонньуулар кыайыылааҕынан Сингапур Национальнай университетын Наукаҕа уонна математикаҕа үрдүкү оскуолата таҕыста. Инньэ гынан, историяҕа киирэр маҥнайгы кубок хаһаайынынан буоллулар.
Интеллектуальнай оонньуулар чэрчилэринэн, уопсайа, уонтан тахса тэрээһин ыытылынна. Итинтэн биэһэ куонкурус. Барыта 151 оскуола кыттыбытыттан, кыайыылаах оскуоланы “Туймаада” олимпиада, «Science Fair» научнай кэмпириэнсийэ-куонкурус, IT-Хакатон, «Роботтар оонньуулара» уонна 3D-моделирование түмүгүнэн быһаардылар. Олимпиада курдук, мэтээлинэн ааҕылынна. Ол курдук, I Интеллектуальнай оонньуу Кубогын хаһаайынынан Сингапур оскуолата буолла. Кинилэр биэс көрүҥтэн үһүгэр бастаатылар. Куобогы СӨ бырабыыталыстыбатын бэрэссэдээтэлин эбээһинэһин толорооччу Владимир Солодов туттарда.
Иккис, үһүс миэстэлэри Румыния оскуолалара үллэһиннилэр. Төрдүскэ В.П.Ларионов аатынан физико-тиэхиньиичэскэй лиссиэй таҕыста.
Оттон Казахстантан сылдьар “Назарбаев интеллектуальнай оскуола” 15 саастаах үөрэнээччитэ Нурдаулет Таумергенов «Science Fair» научнай кэмпириэнсийэ-куонкуруска кыайан, Гран-при хаһаайынынан буолла итиэннэ MyTona аатыттан 5000 дуоллар сэртипикээтин тутта. Кини дьүлэй дьон хамсаныынан кэпсэтиилэрин тылга таһаарар ньыманы тобулбут. СӨ үөрэҕин уонна наукатын миниистирэ Владимир Егоров: «Дьүлэй дьоҥҥо туһалаах тэрили айбыт. Олус уустуга суох датчиктары туттубут. Онон салгыы оҥорон, тарҕатыахтарын сөп», — диэн бэлиэтээтэ.
Людмила ПОПОВА, “Саха сирэ” хаһыат, edersaas.ru
Андрей СОРОКИН (СИА) хаартыскаҕа түһэриилэрэ.
