Бүгүҥҥүттэн Норуоттар икки ардыларынааҕы Интеллектуальнай оонньуулар саҕаланнылар. Хас даҕаны хайысханан бараллар. Олортон биирдэстэринэн Норуоттар икки ардыларынааҕы Интеллектуальнай оонньуулар мультимедийнэй оскуолалара буолар. Бүгүн эдэр кэрэспэдьиэннэр бастакы күннүктэрэ таҕыста.
Күннүк нууччалыы-англиялыы тылларынан, 999 ахсаанынан тахсан, Оонньуулар кыттыылаахтарыгар босхо түҥэтиллэр.
“Кэскил” уонна “Юность Севера” хаһыаттар кылаабынай эрэдээктэрдэрэ Евдокия Иринцеева: “Биһиэхэ суруйар эдэр кэрэспэдьиэннэри талан, сааскы сынньалаҥ кэмигэр үөрэппиппит. Бэс ыйыгар эмиэ Оонньуулар иннилэринэ кылгастык мунньан бэлэмнээбиппит. Кинилэр соруктара – хас биирдии хайысханы толору суруйуохтаахтар уонна күннүк таһаарыахтаахтар.
Мультимедийнэй оскуола Өрөспүүбүлүкэтээҕи лиссиэй-интэринээккэ олохтонно. Биһиги үлэһиттэрбит салалталарынан, эдэр кэрэспэдьиэннэр сүүрэн-көтөн матырыйаал булаллар, бэйэлэрэ хаартыскаҕа түһэрэллэр, нууччалыы, сахалыы, сорохтор английскайдыы суруйаллар. Биһиги французтуу, английскайдыы, кытайдыы кэпсэтэр биэс үлэһиттээхпит. Онон ханнык баҕарар тылга ыарырҕаппаппыт, ыалдьыттары кытта тута кэпсэтэр кыахтаахтар”, — диэн кэпсээтэ.
Оонньуулар бүгүҥҥүттэн саҥа саҕаланнылар. Ол да буоллар, кэлии оҕолорго анаан, эдэр кэрэспэдьиэннэр бастакы күннүгү таһаардылар. Манна СӨ Наукаларын Аччыгый академиятын ректора Василий Павлов эҕэрдэтэ, мультимедийнэй оскуолаҕа үлэлэһэр саха ийэлээх швед оҕотун, кэлии оҕолору кытта сэһэргэһиилэр, санаалар бэчээттэннилэр.
Людмила ПОПОВА, “Саха сирэ” хаһыат, edersaas.ru
