Өрөспүүбүлүкэтээҕи В.П. Ларионов аатынан «Инникигэ хардыы» 29-с научнай кэмпириэнсийэҕэ 1500 үөрэнээччи 33 муниципальнай оройуонтан уонна икки куорат уокуругуттан кыттыыны ылла. Барыта наука араас хайысхаларынан 44 секция үлэлээтэ. Ол туһунан регион салалтатын пресс-сулууспата иһитиннэрдэ.
Хамаанданан кыайыылаахтарынан буоллулар: «Точка роста» ортотугар — Уус Алданнааҕы Лөгөй лицей-интерната, эбии үөрэхтээһин тэрилтэлэригэр — Нерюнгри оҕо айар талаанын сайыннарыы киинэ, үрдэтиллибит таһым оскуолаларыгар — Мииринэй политехническай лицейа, бөдөҥ делегацияларга — Чурапчы улууһа, орто делегацияларга — Эдьигээн оройуона, кыраларга — Ленскэй.
Быйыл икки саҥа хайысха эбилиннэ, онно кыайыылаахтарынан буоллулар: «Биотехнология, клеточные и омиксные технологии» — Симона Андреева, 11 кылаас, өрөспүүбүлүкэтээҕи лицей-интернат, тиэмэтэ «Разработка технологии микроклонального размножения малины обыкновенной» уонна «Беспилотные авиационные системы и технологии» — Светлана Кузьмина, 9 кылаас, физико-техническай лицей, Кванториум уһуйуллааччыта, тиэмэтэ «Использование беспилотного летательного аппарата в систематизации экологического мониторинга качества воздуха».
Киэҥ ыҥырыылаах бөдөҥ тэрээһиҥҥэ Ил Дархан Айсен Николаев эппитинэн, кэмпириэнсийэ — научнай чинчийии былаһааккатын таһынан, Россия уонна Саха сирин наукатыгар уонна технологиятыгар лидердары сайыннаран таһаарар миэстэ буолар.
Кэмпириэнсийэ 1996 сыллаахтан, Саха сирин бастакы президенэ Михаил Ефимович Николаев көҕүлээһининэн ыытыллар.
