105 мөлүйүөн солк суумалаах 17 кутуу кыһыл көмүһү Ингушетия олохтооҕо Саха сиринэн Хотугулуу Кавказ регионугар илдьэр былааннааҕа.
50 саастаах эр киһи ааспыт сыл от ыйыгар Магадан уобалаһыгар бэйэтин «Nissan Qashqai» массыынатынан Ингушетияттан кэлбит, сыаналаах көмүһү сокуоннайа суохтук ылаары. Биллибэт дьонтон илиинэн оҥоһуллубут сир кутуу көмүһүн атыылаһар.
Көмүһү кроссоверын кузовыгар кистиир. Онно анаан араас ньыманы туттар.
Төннөрүгэр айан суолугар регионнар ардыларынааҕы курьер Дьокуускайга тутуллар. Массыына иһиттэн быраабы араҥаччылааччылар 17 кутуу кыһыл көмүс ылыллар, уопсай ыйааһына 17 киилэ. Экспертэр сыаналарынан, көмүс сыаната 105 мөл солк куоһарар.
Дьыала матырыйаала Дьокуускай куорат суутугар тиксэр. Буруйдаахха 5 сылга диэри болдьоххо көҥүлэ быһыллыан сөп. Кыһыл көмүс судаарыстыба дохуотугар бэриллэр.
This post was published on 28.01.2025 13:06 13:06