Н.А. Брызгалов аатынан Индигир орто оскуолата агрохайысханы тутуһан үлэлээбитэ отучча сыл буолла. 1992 сылтан бу оскуола оччотооҕу директора Николай Алексеевич Брызгалов оскуолаҕа оҕуруот аһын үүннэриини киллэрбитэ.
Муома улууһун Индигир үөрэҕин кыһата агропрофилированнай оскуола статуһун сүкпүтэ. Араас сылларга манна козаны, ынаҕы, сылгыны ииппиттэрэ. Билигин сылгыны туталлар.
Оҕуруоттарын аһын төгүрүк сылы бүөбэйдээн таһаараллар. Олунньу ыйтан рассадаларын үүннэрэллэр. Ыам ыйыгар ыһаллар. Сайын устата үүннэрэллэр.
Итини тэҥэ оҕолор сылгыларыгар оттууллар. Кэлиҥҥиттэн балыктыыллар уонна күһүөрү сир астыыллар.
Оскуола директора Светлана Сен-дун-шен кэпсиир: “Самаан сайын барахсан оҕолорго саамай күүтүүлээх, дьоллоох кэм. Оҕолорбут тус-туһунан баһылыыр үлэлэрдээхтэр. Оскуолабытыгар быйыл сайын “Эдельвейс” (3 сезон, оҕуруотчуттар), “Улыбка” (алын сүһүөх кылаастар), “Быйаҥ” (отчуттар, отонньуттар, балыксыттар) лааҕырдар үлэлээтилэр.
Бэриллэр үлэлэр барыта оҕону иитиигэ улахан суолталаахтар”, суруйда https://www.instagram.com/gazetaindigiruottara/
