«Уһук Илин уонна Забайкалье» парламент ассоциациятын уопсай мунньаҕа балаҕан ыйын 18 күнүгэр Читаҕа ыытыллыаҕа. Тэрээһиҥҥэ Ил Түмэн бэрэссэдээтэлэ Алексей Еремеев кыттыаҕа.
Алексей Еремеев Саха Сирин, Бурятия уонна Забайкальскай кыраай элбэх оҕолоох ыаллара ипотека кирэдьиитин төлүүллэригэр мөлүйүөн солкуобайы ылыыга Уһук Илин регионнарын испииһэгин кэҥэтэргэ этии киллэриэҕэ.
Мунньах кэмигэр уопсастыбаннай аһылык тэрилтэлэригэр РФ национальнай стандартарын туһаныы, тыа хаһаайыстыбатын дьоҕус тэрилтэлэригэр судаарыстыбаннай өйөбүлү тупсарыы, «Земский участковый уполномоченный полиции» бырагырааманы бигэргэтии, чэпчэтиилээх ипотека усулуобуйатын тупсарыы уонна СВО кыттыылаахтарыгар эбии төлөбүрү үрдэтии, «Дьиэ кэргэн ипотеката» уонна «Уһук Илиннээҕи уонна Арктика ипотеката» бырагыраамалар усулуобуйаларын уларытыы, ону тэҥэ федеральнай үп суотугар саахалланар туруктаах олорор дьиэ пуондатыттан гражданнары көһөрүү дьаһалларын боппуруостара дьүүллэһиллиэхтэрэ.
Ону таһынан мунньах чэрчитинэн Ил Түмэн уонна Хабаровскай кыраай сокуону таһаарар думатын икки ардыларыгар парламеннар икки ардыларынааҕы бииргэ үлэлээһин туһунан сөбүлэһиигэ илии баттааһын былааннанар.
Парламент ассоциацията Уһук Илин уонна Забайкалье Российскай Федерация субъектарын 11 сокуону таһаарар органнарын түмэр. Уопсай мунньахтарга бу регионнар олохтоохторун долгутар тутаах социальнай-экономическай боппуруостар көрүллэллэр. Урут ассоциация быһаарыылара энергияҕа тарибы сүрүннээһиҥҥэ, федеральнай бюджеттан компенсацияҕа уонна оройуон коэффициеннарын уонна хотугу надбавкалары төлөөһүҥҥэ көмөлөспүттэрэ.
This post was published on 18.09.2025 11:26 11:26