- Ил Түмэн бэрэссэдээтэлэ Алексей Еремеевы кытта көрсүһүүгэ кэлбит П. хотугу тыйыс килиимэт усулуобуйатыгар Уһук Илиҥҥи гектар бырагырааматынан сири туһаныы кэккэ уустуктары үөскэтиэн сөптөөҕүн туһунан бэйэтин санаатын билиһиннэрдэ. Кини сабаҕалыырынан, глобализация кэмигэр Уһук Илин аҕыйах нэһилиэнньэ олорор сирдэригэр дьону кучутан аҕалыы туһугар эмиэ ымпыктаах-чымпыктаах буолуон сөп. Онон бу боппуруоһу уопсастыбаннай истиигэ көрүүгэ кинини киллэрэллэригэр көрдөстө.
Алексей Ильич болҕойон истэн баран, чопчулаан быһааран биэрдэ уонна Уһук Илин гектарга сыһыаннаах уопсастыбаннас тэрээһиннэрэ ыытыллыахтарын иннинэ киниэхэ биллэриэхпит диэтэ.
Испиикэргэ тус көрсүһүүгэ кэлбит предпринимитаель Василий Винокуров Нам улууһугар туризмы сайыннарыы эйгэтин боппуруоһунан сүбэлэһэн, бу хайысханы хайдах сайыннарар туһунан кэпсэтистэ.
Тус көрсүһүүгэ киирбит Ил Түмэн V ыҥырыытын дьокутаата Иннокентий Григорьев мас-рестлинг аан дойду таһымыгар тахсыытыгар уонна Мас-рестлинг норуоттар икки ардыларынааҕы федерациятын 2026 сыл халандаарынай былааныгар киирбит успуорт тэрээһиннэрин ыытыыга сөптөөх үбүлээһини туруоруста.
Кини билигин Норуоттар икки ардыларынааҕы мас-рестлинг федерацията туораттан альтернативнай федерацияны тэрийэ сатааһыны көрсүбүтүн уонна үбүлээһин өттүнэн кыаллыбат боппуруостар баалларын эттэ. Ол курдук федерация 2026 сыллааҕы халандаарынай былаанынан тэрээһиннэри ыытыыга бу сылга 43 мөл солк бүддьүөт көрүллүбүт даҕаны, хантан үбүлэнэрэ чопчуламмакка турар.
1992 сылтан 2001 сылга диэри нэһилиэк баһылыгынан үлэлээбит кырасданьыын С. баһылык быһыытынан биэнсийэтин кээмэйин туһунан боппуруоһунан киирэ сырытта. Кини бу кэм саҕана муниципальнай тэриллиилэр поселениелара өссө да тэриллэ иликтэрэ, онон СӨ Сокуонун 7.1 ыстатыйатынан муниципальнай дуоһунаска сылдьыбыт дьон үлэлээбит сылларын иһин олохтоммут биэнсийэ усулуобуйатыгар сөп түбэспэт.
Кыһалҕалаах киһи ыҥырыыта Ил Түмэн судаарыстыбаннай-быраап Управлениетын көрүүтүгэр бэрилиннэ уонна салгыы бу проблеманы быһаарарга этиилэри киллэрэргэ сорудахтанна.
Бүтэһигинэн Ил Түмэҥҥэ «КПРФ» бэлитиичэскэй баартыйа фракциятын чилиэнэ Эдгар Константинов көрсүһүүгэ киирэн парламент үлэтинэн боппуруоһу көтөхтө. Кэпсэтии түмүгэр Алексей Еремеев быһаарыылары биэрдэ, чопчулаата.
Бу көрсүһүүлэргэ киирбит этиилэр, ыҥырыылар бары хонтуруолга ылылыннылар, салгыы сөптөөх үлэ ыытыллыаҕа.
This post was published on 18.11.2025 14:29 14:29