20 От ыйа 20.07
  • 19°
  • $ 88,02
  • 96,04

Ил Дархан ыччат бырабыыталыстыбатын көҕүлээһинин өйөөтө

17:45, 01 марта 2016
Текст:
Читайте нас на
Яндекс Новости
ЯДВ

Ыччат бырабыыталыстыбата социальнай-экономическай эйгэни сайыннарыыга туһуламмыт бырайыактара Егор Борисов өйөбүлүн ыллылар. Ол туһунан кулун тутар 1 күнүгэр көрсүһүү кэмигэр этилиннэ. 


«Эһиги этиилэргит, олоҕу көрүүгүт миигин олус интэриэһиргэтэллэр. «Улахан» бырабыыталыстыба чилиэннэрэ эмиэ оннук санаалаахтара буолуо дии саныыбын», — диэн көрсүһүүнү арыйыытыгар эттэ.

Ыччат бырабыыталыстыбатын бэрэссэдээтэлэ, Дьокуускайдааҕы килиэп кэмбинээтин генеральнай дириэктэрэ Денис Белозеров иһитиннэрбитинэн, билигин тэрилтэ 30 чилиэннээх. Бары араас эйгэҕэ үлэлииллэр. «Структурабыт «улахан» бырабыыталыстыбаны кытта атылыы, бэйэбит куратордардаахпыт», — диэн кэпсээтэ.

Бу уопсастыбаннай тэрилтэ «Ыччат көҕүлээһинин өйүүр киин» коммерческайа суох тэрилтэ быһыытынан регистрацияламмыт. Онон граннарынан өйөнөр бырайыактары оҥорууга уонна үлэни тэрийиигэ спонсордары көрдөөһүҥҥэ үлэлиэҕэ.

2015 сылга ыччат бырабыыталыстыбатынан 20-тэн тахса тэрээһин ыытыллыбыт. Ол иһигэр «Эдэр фермер» оонньуу, «Поселение – ресурс основы Якутии» үөрэх форума, спортивнай күрэхтэһиилэр, конференциялар. Маны сэргэ Россия таһымнаах акцияларга, съезтэргэ кыттыыны ылбыттара. Дьокуускайдааҕы кыамматтар уонна кырдьаҕастар интернат дьиэлэрин, инбэлиит оҕолор интернаттарын кытта шефтэһии тэриллибитэ.

«Хамаанда баар. Былаан элбэх. Атын регионнары кытта үлэлииргэ бэлэмнэнэбит. Федеральнай тэрилтэлэргэ, ол иһигэр Уһук Илини сайыннарыы министиэристибэтигэр стажировкалары ааһар баҕалаахпыт», — диэтэ Белозеров. 

Кэлэр өттүгэр ыччат хамсааһыннарын съеһин ыытар баҕалаахтарын иһитиннэрдилэр, итиэннэ Егор Борисовы «2030 сылга диэри Саха сирин ыччатын стратегията» бырайыагы дьүүллэһэр форумҥа кыттарыгар ыҥырдылар.

Ил Дархан этиилэри истэн баран: «Биһиэхэ уопсастыбаннай хонтуруол туһунан сокуон баар, ол гынан баран тиһиктээх үлэ ыытылла илик. Манна ыччат түмсүүлэрэ кыттаргыт буоллар. Итиэннэ народнай дружиналар тустарынан сокуон эмиэ баар. ХИФУ, Чурапчы, Сунтаар улуустарыгар үтүө холобурдар бааллар. Манна кыттыһыа этигит», — диэтэ.

Түмүккэ, Егор Борисов өрөспүүбүлүкэҕэ биллэриллибит нэһилиэнньэлээх пууннары тупсарыыга, кэскиллээх хайысхаларга, ол иһигэр доруобуйа харыстабылыгар, суол тутуутугар, нэһилиэнньэ дьарыктаах буолуутугар, сыананы хонтуруоллааһыҥҥа, тыа хаһаайыстыбатыгар, үөрэҕириигэ, олох-дьаһах коммунальнай хаһаайыстыбатыгар, үлэлэһэллэригэр ыҥырда.

Следите за самым важным и интересным в Telegram-канале и WhatsApp-группе ЯСИА