29 Кулун тутар 29.03
  • -14°
  • $ 92,26
  • 99,71

Ил Дархан Владимир Путины кытары ойуур баһаардарын утары охсуһар мунньах түмүктэрин кэпсээтэ

Читайте нас на
Яндекс Новости
ЯДВ

Арассыыйа бэрэсэдьиэнэ Владимир Путин ыам ыйын 10 күнүгэр  ландшафтнай уонна ойуур  баһаардарын утары охсуһууга министиэристибэлэри уонна регион салайааччыларын кытары мунньах ыытта, мунньах кэмигэр кэккэ этиилэр киирдилэр. Саха сирин баһылыга Айсен Николаев эмиэ бэйэтин этиилэрин иһитиннэрдэ, кини судаарыстыба баһылыгын кытта мунньах түмүгүн туһунан СИА-ҕа кэпсээтэ.

«Быйыл Сибииргэ, Уралга-сүүһүнэн дьиэ умайда, элбэх киһи өллө, биллэн турар, бэрэсэдьиэммит  буолбут быһыыга-майгыга улахан болҕомтотун уурда, былырыын Саха сиригэр буолбут улахан баһаар кэннэ биэрбит сорудахтарын төһө толорбуттарын көрдө. Биһиэхэ ааспыт сылга балтараа мөлүйүөн гектардаах ойуур умайбыта ол иһин биһиги бу салааҕа өрүү үп тиийбэтин бэлиэтээбиппит, кэккэ боппуруостары туруортаабыппыт. Бэрэсэдьиэн биһиги кыһалҕабытын өйөөн, этиилэрбитин ылынан, «Биир ньыгыл Арассыыйа» баартыйа съеһигэр даҕаны, бу хайысханы эбии аҕыс млрд. солкуобайынан дойду бүддьүөтүттэн үбүлүүр туһунан соруйбута.  Ол түмүгэр Саха сирэ быйыл федеральнай бүддьүөттэн алта төгүл элбэх үбү ылар уонна ити 1,6 млрд солк., ону тэҥэ биһиги өрөспүүбүлүкэ бүддьүөтүттэн үбүлээһини 2,5 төгүл кэриҥэ улаатыннардыбыт, биһиэхэ манна 900-тэн тахса мөлүйүөн көрүллүбүтэ. Ол түмүгэр биһиэхэ билигин тыа баһаарынайдарын ахсаана икки төгүл элбээтэ, сиргэ да үлэлээччилэр, авиадесантниктар да, авиационнай патрулирование 6 төгүл элбээтэ, уонна баһаары умулларыыга көрүллэр үбүлээһин түөрт төгүл үрдээтэ. Маны таһынан, саҥа авиа салаалары, өрөспүүбүлүкэбитигэр аэромобильнай быыһыыр сулууспатын бөлөҕүн тэрийэр туһунан кэккэ быһаарыылары ылбыппыт, уонна «Экология» национальнай бырайыак чэрчитинэн, Юрий Трутнев быһаарыытынаню, хас да уонунан ыарахан тиэхиникэни атыыласпыппыт. Онон быйыл  үп- харчы өттүнэн эрэ буолбакка, дьон- сэргэ, материальнай базатын хаҥатыытын, материальнай-техническэй резервэлэри да ыллахха баһаар сезонугар быдан бэлэммит. Быйыл ойуур баһаардарын иэнин икки төгүл сарбыйарга үлэлэһэбит», — диэтэ Айсен Николаев.

Дойду бэрэсэдьиэнэ этиллибит этиилэри өйөөбүтүн, уонна федеральнай миниистирдэр уонна салайааччылар регионнар этиилэрэ барыта оруннааҕын уонна төһө кыалларынан бу хайысхаҕа үлэ барыахтааҕын өйдүүллэрин Саха сирин аҕа баһылыга бэлиэтээтэ.

«Искусственнай ардаҕы ыҥырааһын, ааспыт сыл көрдөрүүтүнэн баһаары умуруорууга ордук көдьүүстээх ньыма буолар. Бу боломуочуйалар билигин олоччу федеральнай бас билиигэ бааллар уонна манан федеральнай Авиалесоохрана эрэ сөмөлүөттэрэ эрэ дьарыктаныахтарын сөп. Биһиги быйыл бастакынан Росгидромету кытта дуогабар түһэристибит, онон маннык сөмөлүөттэри арендалаан, ландшафтнай баһаары умулларыыга уонна тыа хаһаайыстыбатын кыһалҕатын быһаарарга өрөспүүбүлүкэбитигэр туһаныахпыт. Маннык сөмөлүөт өрөспүүбүлүкэҕэ бу нэдиэлэ бүтүөр диэри үлэтин саҕалыаҕа. Иккиһинэн, биһиги өрөспүүбүлүкэ бүддьүөтүн үбүгэр билигин Ан- 26 сөмөлүөтү уларытыахпыт, биһиги сакааспытынан «Ростех» госкорпорация анал ураты саппаастары оҥоруоҕа», — диэн Ил Дархан кэпсээтэ.

Следите за самым важным и интересным в Telegram-канале и WhatsApp-группе ЯСИА