Ил Дархан Айсен Николаев от ыйын 21 күнүгэр Нерюнгри оройуонугар сырытта. Вахта оптуобуһун саахалыгар 13 киһи өлүүлээх быһылаанынан мунньах ыытта. Өрөспүүбүлүкэ салайааччыта өлбүттээхтэр уонна эчэйбиттэр дьиэ кэргэттэригэр көмөнү оҥорорго сорудах биэрдэ. Ол туһунан регион салалтатын пресс-сулууспата суруйда.
«Иэдээн быһылаан буолла. Саахалга дьон олоҕо быһынна. Бырабыыталыстыба уонна тус бэйэм ааппыттан дириҥ кутурҕаммын биллэрэбин. Бастатан туран өлбүттээхтэр уонна эчэйбиттэр дьиэ кэргэттэригэр туох баар көмөнү оҥороргутугар көрдөһөбүн. Билигин биир да чааһы куоттарбакка, көмө оҥоһуллуохтаах, хас биирдии кутурҕаннаах дьиэ кэргэн кыһамньыны билиэхтээх», — диэтэ Айсен Николаев.
Мунньахха «Колмар» хампаанньа салалтата, быраабы араҥаччылыыр уоргаттар бэрэстэбиитэллэрэ, медицина үлэһиттэрэ, суһал сулууспалар сотрудниктара кытыннылар. Мунньахха эбии көмө миэрэлэрэ ылылыннылар уонна чугастааҕы кэминэн соруктар туруорулуннулар.
This post was published on 22.07.2025 10:33 10:33