Ил Дархан Айсен Николаев атырдьах ыйын 20 күнүгэр Чурапчы улууһугар үлэлээбитэ. Өрөспүүбүлүкэ баһылыга от хаамыытын тула мунньах ыыппытын уонна бааһынай хаһаайыстыба салайааччыларын кытары көрсүбүтүн туһунан бэйэтин социальнай ситимигэр суруйбут.
«Күн түмүгүнэн тыа хаһаайыстыбатын сайыннарар ааҕыныстыба тэрийиитин туһунан бырайыагы көрдүбүт. Бырайыак тыа хаһаайыстыбатын оҥорон таһаарааччыларыгар, бааһынай хаһаайыстыбаларга юридическай, финансовай көмөнү, бизнес-былаанааһыҥҥа, IT арыаллааһыҥҥа көмөлөһөр соруктаах«, — диэбит Айсен Сергеевич. Кини бырайыагы сэҥээрбитин, атын улуустарга холобур быһыытынан тарҕатыахха сөбүн эппит.
Итини таһынан Ил Дархан улууска тыа хаһаайыстыбатын министиэристибэтин сорох граннара ситиһиилээхтик үлэлиллэрин эппит. Ол курдук Хатылы эдэр фермера Михаил Попов «Агростартап» көмөтүнэн хаһаайыстыбатын кэҥэппит. Михаил быйыл үүтүн элбэтэр сыалтан ыанньыгын ахсаанын элбэтэр былааннааҕын, оттуур ходуһатын кэҥэтэр баҕалааҕын эппит.
Улуус дьаһалтатын көҕүлээһининэн «Дьиэ кэргэн экономикатын сайыннарыы» диэн тыа хаһаайыстыбатын түргэнник ситэр салааларын сайыннарыыга бырайыак үлэлиир. Айсен Николаев бырайыак кыттыылаахтарын кытары – Мария, Роман Кривошапкиннары кытары көрсүбүт. Быйыл бырайыак көмөтүнэн ыаллар тэпилииссэ атыылаһан оҕурсу олордоллор итиэннэ сибиинньэ уонна уон куурусса ылан иитэллэр.
«Тыа хаһаайыстыбата – биһиги төрүт дьарыкпыт. Кини сайдыытыгар бүгүн саҥа көрүүлэр наадалар«, — диэбит Ил Дархан.
This post was published on 21.08.2020 10:01 10:01