Ил Дархан Айсен Николаев Тиксиигэ ууга тимирэ сытар «Днепр» суудунаттан ньиэби кылгас болдьох иһигэр хостуурга сорудахтаата. Баһылык Булуҥ улууһугар командировкаҕа сырытта.
Айсен Николаев атын хараабыллартан киирбит ньиэп тобоҕо уонна кирдээх уу баар суудунатын утилизациялааһын былаанын билистэ. Николаев сорудаҕынан үлэҕэ «Сахаэнерго» уонна «РусГидро» хампаанньалар, академическай институттар, НОЦ «Север» уонна регион научнай тэрилтэлэрэ кыттыахтара.
Ыраастааһын үлэтин 2023 сыл үһүс кыбаарталыгар саҕалыахтара. ГСМ тобоҕун анал тэрилинэн уматан суох оҥоруохтара. Экологияҕа куттал суоһуурун аҕыйатар сыалтан, бон күрүөлэри, сорбент саппаастарын туһаныахтара. Суудунаны бэйэтин утилизациялааһыны ньиэп тобоҕун ыраастааһын кэнниттэн быһаарыахтара.
Үлэни «Генеральная уборка» федеральнайдааҕы бырагыраамаҕа киллэрэр былааннаахтар. 2030 сылга диэри Тиксиигэ 18 тимирбит суудунаны ыраастыыр былаан баар, ол иһигэр «Днепры».
This post was published on 12.07.2023 12:28 12:28