Ил дархан Айсен Николаев үүтү бэлэмнээһин былаанын аһара толоруу иһин үбү оройуоннарга тиэрдэргэ сорудахтаата. Тиийбэт төлөбүр суумата 60 мөл.солк. кэриҥэ буолла.
Ааспыт сыл түмүгүнэн, региоҥҥа үүтү бэлэмнээһин кээмэйэ 63,4 тыһыынча туоннаҕа тэҥнэстэ, ол эбэтэр олохтоммут былаантан 5 тыһыынча туоннанан элбэх. Онуоха олохтоммут нуорманы таһынан туттарыллыбыт үүт иһин үп муниципальнай оройуоннарга тиэрдиллибэтэх.
«Тиийбэт төлөбүр суумата 60 мөл.солк. кэриҥэ. Хомойуох иһин, бу суума төлөммөтөх. Ону ааһан, тыа хаһаайыстыбатын министиэристибэтэ быйылгы сылга 56 тыһыынча туонна кээмэйдээх былааны бигэргэппит, ити ааспыт сыллааҕыны кытта тэҥнээтэххэ, сэттэ тыһыынчанан кыра. Тыа хаһаайыстыбатын сайыннарабыт диир буоллахха, оҥорон таһаарыыны сарбыйыахтаахпыт диэн буолбат. Сорудахтар олунньу 19 күнүгэр диэри бэрилиннилэр. Быһаччы бу күннэргэ бары быһаарыылар ылыллыахтаахтар. Бастатан туран, үп- харчы барыта былааны аһара толорооччуларга тиэрдиллиэхтээх», — диэн Айсен Николаев бэлиэтээтэ.
Өрөспүүбүлүкэ баһылыга итини сэргэ 2026 сылга сорук — 65 тыһыынча туонна үүтү бэлэмнээһин буоларын тоһоҕолоон бэлиэтээтэ.
This post was published on 19.02.2026 11:06 11:06