Саас уонна Үлэ бырааһынньыгын, икки сыл тохтобул кэннэ, Саха сиригэр халҕаһалыы хаамыынан көрүстүлэр. Бу күн үлэ тэрилтэлэрин Ил Дархан Айсен Николаев эҕэрдэлээтэ. Кини өрөспүүбүлүкэ олохтоохторо үлэҕэ ситиһиилэринэн төрөөбүт дойдуларын ааттаталларын бэлиэтээтэ, суруйда СИА.
«Биир кэккэнэн бырааһынньыгы көрсөбүт. Быйылгы Бастакы Маай бырааһынньыга өрөспүүбүлүкэ 100 сылыгар сөп түбэһэр. Онон киэн туттабыт. Өрө күүрүүлээхтик бырааһынньыктыыбыт — инники баран иһэбит.
Саха сирин үлэһит дьоно бэйэлэрин ситиһиилэринэн Россияҕа биллэллэр. Сунтаар улууһун кээпэрэтиибин ыанньыксыта Владимир Африканович Михайлов президент ыйааҕынан Үлэ Геройа ааты ылбыта — бүгүҥҥү бырааһынньыкка улахан бэлэх буолла«, — диэтэ кини.
Айсен Николаев санкциялартан толлубакка, өрөспүүбүлүкэ, дойду иннин хоту сайдыыга баран иһэригэр эрэллээҕин биллэрдэ.
Хаартыска: Андрей Сорокин (СИА)
