Бүгүн олоҥхоһуттарга, оһуохайдьыттарга, уустарга, норуот маастардарыгар Ил Дархан истипиэндийэтин туттарыы сиэригэр-туомугар Олоҥхо үһүс уон сылын тэрийэр уураахха Саха сирин Ил Дархана Айсен Николаев илии баттаата.
«Ааспыт икки уон сылга биһиги олоҥхону үөрэтиигэ, харыстааһыҥҥа, тарҕатыыга элбэх улахан суолталаах көҕүлээһини олоххо киллэрбиппит. Аны кэлэр сылларга үлэбит саҥа таһымҥа тахсыаҕа, научнай уонна үөрэх бырайыактарын олоххо киллэриигэ саҥа аартыктар арыллыахтара», — диэн Ил Дархан бэлиэтээтэ.
Үгэс быһыытынан, Олоҥхо күнүгэр Ил Дархан сыл бастыҥ олоҥхоһуттарыгар, уустарыгар, оһуокайдьыттарыгар, норуот маастардарыгар анал истипиэндийэтин Туоһу суруктарын туттарда.
«Олоҥхо киһи модун кыаҕын, өркөн өйүн уруйдуур, сырдык күүс хара дьайы кыайарын, төрөөбүт дойду чэчирии сайдарын туһугар биир санаалаах, түмсүүлээх буолууну хоһуйар. Биһиги төрүт үгэстэрбитин ытыктыыр, сайыннарар буоламмыт омук быһыытынан кэскиллээхпит, күүстээхпит. Саха омугун төрүт сиэрин-туомун, сатабылын илдьэ сылдьар, киэҥник тарҕатар ытык дьоммутугар ис сүрэхпиттэн махтанабын. Чэгиэн-чэбдик туругу, дьолу-соргуну уонна айар-тутар үлэҕитигэр үрдүк ситиһиилэри баҕарабын!», — диэн Айсен Николаев эттэ, суруйда @nvk_sakha
This post was published on 25.11.2025 18:01 18:01