Бэс ыйын 30 күнэ. Ил Дархан «Ленскэй кулууп» информационнай-аналитическай киин төгүрүк остуолугар кытынна. Манна култуура уонна норуот үгэстэрэ экэниэмикэ сайдыытыгар суолталарын көрдүлэр. Тэрээһиҥҥэ федеральнай экспертэр, ЮНЕСКО, наука уонна култуура, креативнай индустрия бэрэстэбиитэллэрэ кытыннылар.
«Саха сирэ бүгүн креативнай индустрияҕа Уһук Илиҥҥэ бастыҥ уонна креативнай экэниэмикэҕэ Арассыыйа биир сайдан-үүнэн иһэр чопчута буолар. Биһиги сүрүн баайбыт – дьон. Биһиги киһини билиҥҥи үөрэххэ уһуйарбыт таһынан төрүт үгэстэрин, дойдутун уонна култууратын ытыктыыр гына иитэрбит тухары иннибит диэки баран иһиэхпит. Арассыыйатааҕы арктическай култуура дьайыытын күүһүрдүү миссиятын Дьокуускай куоракка тутулла турар Арктикатааҕы эпос уонна искусство киинэ толоруоҕа. Бу киин биһиги айар-тутар дьоммут аан дойду таһымыгар тахсар, оттон аан дойду култуурата биһиэхэ кэлэр былаһааккатынан буолуоҕа», — диэн эттэ Айсен Николаев төгүрүк остуолга.
Ол курдук, быйыл өрөспүүбүлүкэҕэ креативнай индустрияҕа аналлаах норуоттар икки ардыларынааҕы улахан форум буолан ааста. Манна стратегическай суолталаах сөбүлэҥнэри түһэристилэр, ол иһигэр Саха сиригэр оҥоһуллубут «Экстра Синема» технологияны Индия ырыынагар таһаарар туһунан докумуоҥҥа илии баттаатылар.
Ил Дархан глобализация кэмэ национальнай үгэстэргэ, тылга, култуураҕа тургутуу буолар диэтэ.
«Билиҥҥи технологиялары, коммуникациялары баһылаан, медиа ньууругар үлэлиэххэ, сөптөөх контены оҥоруохха наада. Маныаха бэйэ үгэстэригэр, култууратыгар тирэнэн глобализация бырасыастарыгар дьайыахха сөп. Маннык гынар түгэммитигэр, биһиги өссө күүстээх буолуохпутун сөп. Биһиги күүспүт Арассыыйаҕа олорор хас биирдии норуот национальнай идентичноһыгар, уратытыгар сытар», — диэн тоһоҕолоон эттэ Айсен Николаев.
Бэс ыйын 30 күнэ. Ил Дархан бу күн Арассыыйа Дьоруойа, дойду Үөрэххэ министиэристибэтин Оҕо сынньалаҥар, эбии үөрэхтээһиҥҥэ уонна иитиигэ судаарыстыбаннай бэлиитикэтин департаменын баһылыыр-көһүлүүр Игорь Юргинныын көрүстэ.
Салайааччылар үүнэн иһэр көлүөнэни иитиигэ бииргэ үлэлэһии сүрүн хайысхаларын, оҕо сынньалаҥын бырагыраамаларын сайыннарыы уонна алын сүһүөх байыаннай бэлэмнэнии куурсугар аналлаах бырайыактар кэскиллэрин туһунан кэпсэттилэр.
Ол курдук, атырдьах уонна балаҕан ыйыгар Саха сирин «Энергетик» лааҕырыгар кэккэ тэрээһин ыытыллыаҕа.
«Айсен Сергеевичтыын оҕону иитии ньымаларын, сынньалаҥы тэрийии уонна алын сүһүөх байыаннай бэлэмнэнии ыйытыыларын туһунан кэпсэттибит. Саха Өрөспүүбүлүкэтэ – көхтөөх уонна эрэллээх партнёр. Арассыыйа Дьоруойдара Дмитрий Куценко уонна Николай Соболев Саха сиригэр өйөбүл ылбыттарыттан үөрэбин. Кинилэр стажировканы манна барарга этии киллэрдилэр», — диэтэ Игорь Юргин.
Санатан эттэххэ, Игорь Юргин 2024 сыл балаҕан ыйыгар өрөспүүбүлүкэ ыччат дьыалатыгар уонна социальнай коммуникацияларга миниистирин эбээһинэһин толорооччунан анаммыта. Дойду үөрэххэ миниистирэ Сергей Кравцов Саха сиригэр сырыытыгар Игорь Юргины департамент салайааччытынан үлэлии ыҥырбыта.
От ыйын 1 күнэ. Ил Дархан видеосибээһинэн Өлүөхүмэҕэ оҕо поликлиникатын үөрүүлээхтик арыйыыга кытынна. Урукку өттүгэр маннык сыалга анамматах дьиэҕэ үлэлии турбута. Онон улуустааҕы оҕо поликлиникатыгар бары ирдэбилгэ эппиэттиир, саҥа таас дьиэни атыылаһан биэрдилэр.
Айсен Николаев Өлүөхүмэ дьонун-сэргэтин бу бэртээхэй түгэнинэн эҕэрдэлээтэ. Ил Дархан кэлиҥҥи биэс сылга Саха сирин араас муннуктарыгар барыта 110-ча доруобуйа харыстабылын эбийиэктэрэ тутуллан киирбиттэрин, ол иһигэр Дьокуускай куоракка Онкологическай уонна Кардиологическай кииннэр дьэндэйбиттэрин бэлиэтээтэ.
«Өлүөхүмэҕэ олус наадалаах эбийиэк үлэҕэ киирбититтэн үөрэбин. Поликлиника сырдык, сылаас, онон оҕолорго, төрөппүттэргэ уонна үлэһиттэргэ табыгастаах буолуоҕа диэн эрэнэбин. Үүнэн иһэр көлүөнэбитин туох баар саамай үчүгэйинэн хааччыйыахтаахпыт. Оҕолор доруобуйаларыгар кыра эрдэхтэриттэн болҕомто ууруллуохтаах – ити былаас биир сүрүн соруга. Өлүөхүмэ оройуонугар «Доруобуйа харыстабылын маҥнайгы тиһилигин саҥардыы» бырагырааманан ааспыт сылга маны сэргэ Дьахтар төрүүр уонна Оҕо консультациятын дьиэлэригэр хапытаалынай өрөмүөн ыытыллыбыта», – диэн эттэ Айсен Николаев.
Саҥа поликлиника 20 кабинеттаах, ол иһигэр 4 педиатрическай учаастак, невролог, стоматолог, хараҕы эмтиир, УЗИ уонна анал специалистар хосторо бааллар. Итини сэргэ инфекционнай бокс, туспа киирэр ааннаах суһал көмө кабинета үлэлиэхтэрэ.
От ыйын 1 күнэ. Ил Дархан бойобуой дьайыы бэтэрээннэрин күннэринэн эҕэрдэлээтэ.
«Бу Саха сиригэр 2021 сыллаахха төрүттэммит бэлиэ күн Иккис аан дойду сэриитин кэнниттэн дойдуларын саа-саадах тутан көмүскээбит саха буойуттарын үтүөлэрин билинии буолар. Эһиги хорсун быһыыгыт, дойдугут туһугар бэйэҕитин харыстаммакка киирсиигит – улахан ытыктабыллаах суол.
Бу күн биһиги аан дойду бары муннуктарыгар, «итии туочукаларга» дойдуларын иннигэр иэстэрин чиэстээхтик төлөөбүт уолаттарбытыгар махталбытын тиэрдэбит. Улахан ытыктабылбытын анал байыаннай дьайыы бэтэрээннэригэр этэбит. Кинилэр ортолоругар Афганистаҥҥа, Хотугу Кавказка сылдьыбыт буойуттар аҕыйаҕа суохтар. Саха сирэ уонна бүтүн дойду Арассыыйа Дьоруойдара, бойобуой уордьан, мэтээл кавалердара буолбут, Арассыыйа аармыйатыгар аатырбыт-сураҕырбыт саха уолаттарынан киэн туттар. Бойобуой дьайыы бэтэрээннэрэ байыаннай-патриотическай иитиигэ көхтөөхтүк кытталлар, бэйэлэрин бойобуой уопуттарын «Буойун» киин уонна Юнармия иитиллээччилэригэр биэрэллэр», — диэн эттэ Айсен Николаев эҕэрдэ тылыгар.
От ыйын 2 күнэ. Ил Дархан Д.К. Сивцев – Суорун Омоллоон аатын сүгэр опера уонна балет судаарыстыбаннай театрын «Күлүмнэс таас» этно-балет айар бөлөҕүн кытта көрүстэ.
Этно-балет XXXI Арассыыйатааҕы «Көмүс Мааска» национальнай театральнай бириэмийэ үс хайысхатыгар лауреат буолла. Спектакль «Бастыҥ спектакль. Балет» номинацияҕа кыайыыны ситистэ, Мария Кузьмина «Бастыҥ дьахтар оруола. Балет» наҕарааданы тутта, оттон Иван Шандровскай «Уот художнигын бастыҥ үлэтэ. Музыкальнай театр» диэн хайысхаҕа бэлиэтэннэ.
Айсен Николаев куонкурус кыайыылаахтарын эҕэрдэлээтэ уонна театр дириэктэрэ Владислав Левочкиҥҥа, спектаклы туруорааччыларга, артыыстарга махталын биллэрдэ.
«Үрдүк наҕараадаҕытынан эҕэрдэлиибин. Бу биһиги дойдубутугар саамай улахан театральнай бириэмийэ. Үс номинацияҕа тута кыайыы – улахан үлэ түмүгэ. Опера, балет театрын уонна Олоҥхо театрын бииргэ үлэлэһиилэрэ үтүө түмүктээх буолла. Саха сирэ барыта эһигинэн киэн туттар», – диэн эттэ кэпсэтии кэмигэр Ил Дархан.
«Күлүмнэс таас» Саха сиригэр алмаас үөскээһинин туһунан үһүйээҥҥэ олоҕурар. Манна саха фольклора чаҕылхай уобарастарынан, билиҥҥи технологияларынан уонна анал эффектэринэн күүһүрдүллэн көрдөрүллэр.
XXXI Арассыыйатааҕы «Көмүс Мааска» национальнай театральнай бириэмийэни туттарыы бэс ыйын 26 күнүгэр Казань куоракка Г. Камал аатын сүгэр Татарстан судаарыстыбаннай академическай театрын саҥа дьиэтигэр буолла.
Быйыл куонкуруска 170 куораттан 734 спектакль кытынна.
От ыйын 3 күнэ. Ил Дархан дойду Бырабыыталыстыбатын чилиэннэрин кытта мунньахха судаарыстыба баһылыга Владимир Путиҥҥа өрөспүүбүлүкэҕэ хоту таһаҕас таһыытыгар балаһыанньа туһунан дакылааттаата.
Саха сиригэр хоту таһаҕас таһыы сыллааҕы кээмэйэ 1 мөл. 382 тыһ. туоннаҕа тэҥнэһэр. Ити дойду бу хайысхаҕа барыллаан кээмэйин – 40 бырыһыана. Бүгүҥҥү күҥҥэ былааннаммыт таһаҕас аҥаарыттан ордук – 753 тыһ. туонна хайыы-үйэҕэ анаммыт сиригэр тиэрдилиннэ.
«Билигин ордук сытыытык сайыҥҥы навигация боппуруоһа турар. Биһиги сайыҥҥы кэмҥэ өрүстэринэн 635 тыһ. туонна таһаҕаһы илдьиэхтээхпит, итинтэн билигин 157 тыһ. анаммыт миэстэтигэр тиэртибит», – диэн дакылааттаата өрөспүүбүлүкэ баһылыга.
Ил Дархан эппитинэн, ирдэнэр 39 млрд солк. 29,2 млрд солк. үбүлэннэ. Айсен Николаев хоту таһаҕаһы тиэйээччилэр коммерческай кредиттэрин бырыһыаннарын субсидиялыыр механизмы киллэрэргэ этии киллэрдэ.
Маны таһынан, эрэгийиэн бүддьүөтүгэр эбии көмө наада.
Айсен Николаев этиилэрин Камчатка губернатора Владимир Солодов уонна Чукотка губернатора Владислав Кузнецов өйөөтүлэр.
Арассыыйа үпкэ миниистирин бастакы солбуйааччыта Ирина Окладникова эрэгийиэннэр ороскуоттара көрүллүөхтэрэ диэтэ.
Дойду Бэрэсидьиэнэ Владимир Путин хоту таһаҕаһы таһыы боппуруостара түргэнник быһаарыллан иһиэхтээхтэрин тоһоҕолоон бэлиэтээтэ. Уларыйа турар халлаан уонна кылгас навигация кэмигэр хас биирдии күн күндү. Судаарыстыба баһылыга үп министиэристибэтигэр уо.д.а. эппиэттээх уорганнарга балаһыанньаны хонтуруоллуурга уонна хоту таһаҕас тиэйиитин бары түһүмэхтэрин кэмигэр үбүлүүргэ соруйда.
От ыйын 3 күнэ. Айсен Николаев Нерюнгри куорат аэропордугар Гавриил Иосифович Чиряевка анаммыт өйдөбүнньүк бэлиэни аһыы тэрээһинигэр кытынна. Ааспыт ыйга дойду Бэрэсидьиэнэ Владимир Путин Гавриил Чиряев аатын бу аэропорка иҥэрэр туһунан ыйаахха илии баттаабыта. Икки мэндиэмэннээх, 9 тыһ. кв. миэтэрэ иэннээх саҥа дьиэ 2023 сылга ахсынньыга аһыллыбыта.
Ил Дархан Кабактинскайдааҕы таас чох разреһын аһыллыытыгар бу бырайыак олоххо киириитэ Нерюнгри оройуонугар, Саха сиригэр эрэ буолбакка, дойду чоҕу хостуур салаатыгар улахан суолталааҕын, сүүһүнэн үлэ миэстэтэ тахсыаҕын бэлиэтээтэ. Манна таас чох саппааһа 127 мөл. туонна чуолкайдаммытынан уонна 1,2 млрд туоннаттан 1,7 млрд туоннаҕа тиийэ сабаҕалааһынынан баара биллэр. Чох хостооһунугар бэлэмнэнии үлэтэ 2024 сылга саҕаламмыта. Дойдуга бу салаа бөдөҥ СУЭК хампаанньатын тэрилтэтэ 2027 сылга бастакы учаастакка 750 тыһ. туоннаны хостуур кирбиигэ тиийэр былааннаах.
Айсен Николаев Нерюнгрига Олоҥхо ыһыаҕа ыытыллар Таастаах ытык сиргэ Моҕол ураһаҕа олоҥхоһуттар түһүлгэлэрин аһан, «Олоҥхо оспот омоон суолларынан» диэн өрөспүүбүлүкэтээҕи күөн-күрэһи арыйар сиэргэ-туомҥа кытынна. Ил Дархан сылтан сыл аайы тэрээһиҥҥэ биллэр олоҥхоһуттары тэҥэ ыччат, оҕо, бөлөҕүнэн толороооччулар ахсааннара элбээн иһэрин, ол биһиги олоҥхобут инникилээҕин көрдөрөрүн бэлиэтээтэ. Тэрээһин бочуоттаах ыалдьыттарынан өрөспүүбүлүкэҕэ биллэр олоҥхоһуттар буоллулар.
Ил Дархан тимир уустарын түһүлгэлэригэр Таатта сиригэр Алдан өрүстэн хостоммут тимир болгуону уһаарыыга кытынна. Айсен Николаев – төрүттэрэ тимир уустара. Кини сыл аайы Олоҥхо ыһыахтарыгар уустары кытта тимири уһаарсара үтүө үгэскэ кубулуйбутун туһунан эттэ. Кэлиҥҥи сылларга саха уустара оҥорбут быһахтара, хомустара аан дойдуга тиийэ аатырбытын, эдэр ыччат сэҥээрэрэ улааппытын, онон төрүт үгэспит сайда турарыгар эрэллээҕин туһунан эттэ. Быйыл уустар болгуоттан 4 киилэ тимири ыллылар.
От ыйын 4 күнэ. Ил Дархан Саха сирин олохтоохторун XVIII өрөспүүбүлүкэтээҕи Олоҥхо Ыһыаҕынан эҕэрдэлээтэ. Олоҥхоҕо биһиги өбүгэлэрбит сырдыкка-кэрэҕэ дьулуһууну, төрөөбүт дойдуларыгар тапталы, модун санааны уонна кыайыыга бигэ эрэли, кырдьаҕаска ытыктабылы уонна кыраҕа-кыаммакка көмүскэллээх сыһыаны көрдөрөллөрө, бу сүрүн тосхоллор көлүөнэттэн көлүөнэҕэ бэриллэн, бүгүн даҕаны былыргы култуурабыт күннээҕи олохпут арахсыспат аргыһа, норуоппут өлбөт-сүппэт үйэлээх муудараһа буолан иҥэн сылдьарын бэлиэтээтэ.
Олоҥхо ыһыаҕын чэрчитинэн Саха Өрөспүүбүлүкэтин Нерюнгри оройуона уонна Донецкай Норуодунай Өрөспүүбүлүкэ Шахтерскай муниципальнай уокуруга сөбүлэһии түһэрсэр тэрээһиннэригэр Ил Дархан кытынна. Өрүттэр инвестиция, экэниэмикэ, култуура уонна туризм салааларыгар бииргэ үлэлээһини хардарыта сайыннарыахтара, олорор дьиэни, суоллары, социальнай-култуурунай суолталаах эбийиэктэри тутууга уонна тупсарыыга үрдүк технологиялары киллэрии үөрүйэхтэрин үллэстиэхтэрэ.
Айсен Николаев «Таастаах» түөлбэтигэр XVIII өрөспүүбүлүкэтээҕи Олоҥхо Ыһыаҕын арыллыытыгар «Ытык Дуоҕаны» ытык сэргэҕэ туруорда, бырааһынньык саҕаламмытын биллэрдэ. «Олоҥхо Ыһыаҕын Кыайыы 80 сылыгар уонна Нерюнгри куорат төрүттэммитэ 50 сылыгар анаан ыытабыт. Аҕа дойду Улуу сэриитигэр кыайбыт дьоруой көлүөнэлэрбитигэр уонна 70-с сылларга дойду араас муннугуттан кэлэн, бүгүн Арассыыйа үрдүнэн аатырбыт Нерюнгри куораты туппут эдэр ыччакка махталбытын тиэрдэбит, Ыһыаҕы бэлэмнээһиҥҥэ кыттыбыттарга, Нерюнгри улууһун бары олохтоохторугар, кинилэр күүстэринэн, доҕордоһууларынан бу кэрэ бырааһынньыгы тэрийбиттэрин иһин Саха норуотун аатыттан барыгытыгар барҕа махталбын тиэрдэбин», — диэн эттэ. Алгыс үтүө тыллара манна баар дьоҥҥо, Саха сирин бары олохтоохторугар уонна Аҕа дойдубутун көмүскүү сылдьар уолаттарбытыгар тиийэригэр эрэлин биллэрдэ.
Ыһыах аһыллыытын кэннэ Айсен Николаев суруналыыстары кытта кэпсэтэригэр Олоҥхо Ыһыаҕа – Саха сирин бары олохтоохторун түмэр биһиги уопсай национальнай бырааһынньыкпыт буоларынн эттэ. Ил Дархан Олоҥхо Ыһыаҕар анаан оҥоһуллубут Таастаах түөлбэтин үрдүктүк сыаналаата. Барыта 16 эбийиэк тутуллубута, ол иһигэр оҕо куоратын уонна успуорт былаһааккатын саҥардыы ыытыллыбыта. Чульман өрүскэ туланы көрөр былаһааккалар оҥоһуллубуттара, суол тупсарыллыбыта, пааркаҕа тиэхиньикэ саҥардыллыбыта. Хамаанда күүһүн-уоҕун уонна үлэтин түмүгэр үөскээбит түөлбэ Нерюнгри олохтоохторугар уонна ыалдьыттарыгар өр кэмҥэ сулууспалыаҕа уонна сөбүлээн сынньанар, көрсүһэр сирдэринэн буолуоҕа диэн бэлиэтээтэ.
Айсен Николаев уустар уонна норуот маастардарын түһүлгэлэригэр батыйаны оҥорооччулар өрөспүүбүлүкэтээҕи куонкурустарын түһүлгэтигэр бастыҥ уустар уһаарбыт батыйаларын көрдө. Маннык оҥоһуктарга биһиги норуоппут култуурата, устуоруйата уонна олоҕу көрүүтэ көстөр диэн бэлиэтээтэ. Куонкуруска кыттар 7 маастар батыйаларын маһы кэрдиигэ, боолдьоҕу уонна кумааҕыны быһыыга көрдөрдүлэр. Бастыҥынан Амма улууһуттан Александр Карамзин ааттанна.
Уустар уонна норуот маастардарын түһүлгэлэригэр быйыл аан бастаан улуустардааҕы Олоҥхо дьиэлэрэ саха былыргыттан илдьэ кэлбит сиэрин-туомун көрдөрдүлэр. Намнааҕы Олоҥхо дьиэтэ саһылы бултаан Баай Байанайга сүгүрүйүү, Аммалар – оҕо төрөөһүнүн, Уус Алданнар – салама баайыы, Мэҥэ Хаҥаластар – сүктэр кыыс кэргэнин дьиэтигэр кэлиитин, Хотугу аҕыйах ахсааннаах норуоттар Сэвэк-Мо бэлиэни туруоруу сиэрин-туомун толордулар. Кэлэр Олоҥхо ыһыахтарыгар тэрээһин кэҥээн иһиэҕэ.
Салгыы Ил Дархан олоҥхоһуттар түһүлгэлэригэр күрэс кыттыылаахтарын толоруутун иһиттэ. Куонкуруска 200-тэн тахса киһи кэлбит. Быйылгы күрэс уратыта — улахан дьону икки бөлөххө араарбыттар: 36 саастарыттан 60-гар диэри уонна 61 саастарыттан үөһээ. Саамай эдэр кыттааччы 9 саастаах оҕо, улахан — 90 сааһыгар чугаһаабытх ытык кырдьаҕас.
Айсен Николаев «Маастардар куораттара» өрөспүүбүлүкэтээҕи быыстапка түһүлгэтигэр 15 улуустан 65 маастар туруорбут ураты үлэлэрин көрдө. Ол иһигэр — саха үгэс, сэлии муоһуттан, кылтан, оҕуруоттан, тирииттэн, мастан оҥоһуктар, дьиэни-уоту киэргэтэр тэриллэр бааллар.
Ил Дархан оһуохай түһүлгэтигэр күөн-күрэс кыттыылаахтарын кытта көрүстэ. Ыччат уонна улахан дьон икки ардыгар илин эҥэр уонна Бүлүү бөлөх түөлбэлэр оһуохайдарыгар күрэскэ 100-тэн тахса киһи кыттар, ол иһигэр 86 саастаах ытыктанар этээччи.
Айсен Николаев Хотугу аҕыйах ахсааннаах норуоттар түһүлгэлэригэр ыалдьыттаата. Ил Дархан соҕуруу Саха сирин эбэҥкилэрин «Манчорай» иилии эргийэр үҥкүүлэрэ материальнайа суох этническэй култуура эбийиэктэрин Саха сиринээҕи реестригэр киллэриллибитин туһунан сибидиэлистибэни туттарда. Эбэҥки норуотугар төрөөбүт тылларын уонна култуураларын утумнаахтык сайыннаралларыгар барҕа махталын биллэрдэ. Айсен Николаев түһүлгэҕэ сылдьар кэмигэр нимнгакан уонна нимкан куонкурса буола турара.
Ил Дархан хомус түһүлгэтигэр өрөспүүбүлүкэтээҕи күрэс кыттааччыларын кытта көрүстэ. Манна 40-тан тахса киһи уонна 10 бөлөҕүнэн толороччу мустубут. Айсен Николаев күрэхтэһии таһыма үрдүгүн бэлиэтээтэ. Хомуска дьүһүйүүгэ 20-тэн тахса араас тиэмэни бэлэмнээбиттэр, ол иһигэр Улуу Кыайыы 80 сылын, олонхо, оһуохай, кымыс иһиитин сиэрэ-туома, сайын уонна да атыттар.
От ыйын 6 күнэ. Айсен Николаев Нерюнгрига Киин оройуоннааҕы балыыһаҕа саҥардыллыбыт уонна мэдиссиинэ тэрилинэн толору хааччыллыбыт дьахтар консультациятын дьиэтин уонна «А» блогун хапытаалынай өрөмүөнүн хаамыытын бэрэбиэркэлээтэ. Бу үлэ куорат агломерациятын 2030 сылга диэри кэлимник социальнай-экэнэмиичэскэй сайдыытын былаанын чэрчитинэн ыытыллар. Ил Дархан дьахтар консультациятын дьиэтин бу ыйга үлэҕэ киллэрэргэ уонна «А» блокка үлэни болдьоҕор түмүктүүргэ сорудахтаата.
Айсен Николаев Нерюнгрига саҥардыы үлэҕэ киирбит элбэх хайысхалаах успуорт былассааккатыгар оҕолору кытта көрүстэ. Куорат эдэр олохтоохторо үөрэ-көтө бииргэ футбол, баскетбол, волейбол оонньуулларын, сүүрэллэрин, тренажердарга эрчиллэллэрин туһунан кэпсээтилэр. Ил Дархан манна улахан да дьон, оҕо да успуордунан дьарыктаналларыгар табыгастаах уонна куттала суох усулуобуйа тэриллибитин бэлиэтээтэ. Эбийиэк улуус бүддьүөтүттэн үбүлэммит уонна «Колмар» хампаанньа көмөлөспүт.
Күндү Саха сирин олохтоохторо! Сайыммыт уот куйааһынан хатаҕалаабатар да, чэлгийэр күөҕүттэн, сылаас салгыныттан дуоһуйа сомсуоҕун, ардаҕа суох күннэри таба туһаныахха, от үлэтигэр саҕалааһын таһаарыылаах буоллун.
Афанасий Ноев
This post was published on 08.07.2025 11:31 11:31