Куйаар ситимигэр кинини «оҕо саас амбассадора» диэн ааттыыллар. Саамай киэҥник биллибит видеоларынан Айыына Амма улууһун Болугур сэлиэнньэтигэр эһэтигэр уонна эбэтигэр ыалдьыттыы сылдьан устубута буолар.
Ил Дархан Айсен Николаев Айыына Кожурова Төрөөбүт тыл уонна сурук-бичик күнүгэр анаан #ҺӨҔҮҤ бырайыагын өйөөн, онно кыттар баҕалааҕын туһунан МАХ ханаалыгар иһитиннэрдэ.
—Амматтан төрүттээх Айыына Кожурованы кытары көрүстүм. Айыына күннээҕи олоҕуттан тэттик видеолары устар. Бүгүн кини «ҺӨҔҮҤ» диэн бэйэтин саҕалаабыт челленджын туһунан астына иһиттим. Ол курдук, Айыына сахалыы тыыннаах контент элбиирин курдук дьон-сэргэ сөҕөр-махтайар, кэрэхсиир чахчыларын устан таһаарыҥ диэн ыҥырар. Оҕо бэйэтин төрөөбүт тылынан саҥарара биллэн турар хайҕаллаах. Айыына сахалыы-нууччалыы толлубакка саҥарар, омук тылларын үөрэтэр, араас күрэхтэргэ кыттар. Айыына курдук сытыы-хотуу, аныгылыы толкуйдаах кэнчээри ыччаппыт элбии турдун!, — диэн Айсен Сергеевич суруйда.
