Саха Өрөспүүбүлүкэтин салалтатын уонна тус бэйэм ааппыттан Норуот маастарын күнүнэн эҕэрдэлиибин!
Норуот уус-уран оҥоһуктара элбэх омуктаах Олоҥхобут сирин култуурунай баайын быстыбат сорҕотунан буолар. Бүгүн “Саха Өрөспүүбүлүкэтин норуот маастара” бочуоттаах ааты 316, “Саха Өрөспүүбүлүкэтин уус-уран оҥоһуктарын норуот маастара” ааты 726 киһи сүгэр, кинилэр ахсааннара эбиллэ турар.
Быйыл Кыайыы 80, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылыгар билиҥҥи уонна кэлэр көлүөнэлэри духуобунай өттүнэн байытар, төрөөбүт дойдуга тапталы угуттуур аналлаах үйэлэри нөҥүөлээн кэлбит үгэстэрбитин тыыннаах хаалларыы уонна сайыннарыы дьоһун суолтатын бу күн өссө төгүл бигэргэтэр.
Холобур, саха быһаҕа киһи ис күүһүн, улахан тургутууга самныбат санаатын туоһулуур. Тимир ууһа сүрэҕин-быарын ууран, төрөөбүт сирбит күүһүн-күдэҕин бу оҥоһугар иҥэрэр. Өрөспүүбүлүкэбит араас муннуктарыттан тимир уустара оҥорбут ураты тыыннаах быһахтарын санааны бөҕөргөтөр сыаллаах анал байыаннай дьайыы кыттыылаахтарыгар туттарабыт. Кинилэргэ анаан өрөспүүбүлүкэ куораттарыгар уонна сэлиэнньэлэригэр маастардар уопсастыбаннай холбоһуктара, уран тарбахтаахтар ичигэс таҥаһы тигэллэр, харысхаллары бэлэмнииллэр.
Быйыл бу бэлиэ күн хоһуун буойуттарга, Ийэ дойдуну көмүскээччилэргэ аналлаах быыстапкалар, маастар-кылаастар уонна айар киэһэлэр тэриллиэхтэрэ. Дьокуускай куоракка өрөспүүбүлүкэ норуоттарын бэрэстэбиитэллэрэ дьэрэкээн ойуулаах национальнай таҥастарын кэтэн сэлэлээн хаамыахтара.
Араас идэлээх уонна саастаах дьону түмэр “Якутия мастеровая” быыстапка-дьаарбаҥка тутаах тэрээһининэн буолуоҕа. 15-с төгүлүн ыытыллар бу түһүлгэҕэ биллиилээх маастардар уонна эдэр талааннар бэйэлэрин үлэлэрин дьон-сэргэ болҕомтотугар таһаарыахтара, уопуттарын үллэстиэхтэрэ. Семинардарга уонна “төгүрүк остуолларга” үгэс буолбут илиинэн оҥоһуктары оҥорон таһаарыы аныгы экэниэмикэҕэ кэскилин дьүүллэһиэхтэрэ.
“Битва клинков – Кылаан Кылыс” – саха быһаҕын оҥорооччулар, “Тууйас” туоһунан тигээччилэр, “Пульдьэрук” патронтааһы оҥорооччулар, “Өрөгөй Чорооно” маһы кыһааччылар – биир идэлээхтэр куонкурустара ыытыллыаҕа. Өбүгэлэртэн бэриллибит дьоҕуру уонна быстыбат ситими кэрэһилиир оҥоһуктары айан таһаарар өрөспүүбүлүкэ бастыҥ маастардарыгар “Саха Өрөспүүбүлүкэтин норуодунай маастара” уонна “Удьуор Утум” үрдүк ааттар иҥэриллиэхтэрэ.
Норуот уус-уран оҥоһуктары оҥорон таһаарар дьарыгын судаарыстыбаттан өйүүр концепция ситиһиилээхтик олоххо киллэриллэр. Тимир уустарыгар, норуот маастардарыгар, олоҥхоһуттарга, оһуохайы таһаарааччыларга Ил Дархан стипендията туттарыллар. Норуот уус-уран оҥоһуктарын кииннэрин, илиинэн оҥоһуктар дьиэлэрин алыптаах эйгэлэригэр уһуйуллар дьон ахсаана үксүүр. Биһиги хотугу дойдубут матырыйаалынай култууратын харайар, сылаас тыынныыр норуот маастардарын инникитин да өйүөхпүт.
Ытыктабыллаах норуот маастардара! Эһиги ураты суоллаах-иистээх айар үлэҕит олохтоох дьону-сэргэни, өрөспүүбүлүкэ ыалдьыттарын үтүөҕэ-сырдыкка кынаттаатын, эһиги көмүс тарбаххыт чочуйбут айымньылара биһиги баай дойдубут кэрэтин кэрэхсэтэ туруохтун.
Эһиэхэ или, эйэни, этэҥҥэ буолууну, уҕараабат эрчими уонна таһаарыылаах үлэни, үтүө саҕалааһыннаргытыгар ситиһиилэри, айар-тутар былааҥҥыт олоххо киирэригэр баҕарабын.
Айсен Николаев, Саха Өрөспүүбүлүкэтин Ил Дархана
