25 От ыйа 25.07
  • 29°
  • $ 86,55
  • 94,38

Ил Дархан Айсен Николаев Аҕа дойдуну көмүскээччи күнүнэн эҕэрдэлиир

11:43, 23 февраля 2021
Текст:
Читайте нас на
Яндекс Новости
ЯДВ

Ытыктабыллаах Саха Өрөспүүбүлүкэтин олохтоохторо! Саха Өрөспүүбүлүкэтин салалтатын аатыттан эһигини Аҕа дойдуну көмүскээччи күнүнэн эҕэрдэлиибин! Хас биирдии эр киһи, кини туох дьарыктааҕыттан тутулуга суох, Аҕа дойдутун көмүскүүр эбээһинэстээх. Ол иһин бу күн үгэс быһыытынан Россия эр дьонун барытын чиэстиибит. Бу – чахчы норуот бырааһынньыга.


Бүгүн биһиги байыаннай сулууспалаахтарга – гражданнар нус-бааччы олохторун көмүскэлигэр турар, түптээх олохпутун араҥаччылыыр, дойдуга куттал суох буолуутун хааччыйар хорсун-хоодуот дьоммутугар ураты махталбытын тиэрдэбит.

Биһиги Россия аармыйатынан, килбиэнинэн уонна чиэһинэн, байыаннай кыаҕынан уонна эйэни бөҕөргөтөр аналынан киэн туттабыт.

Бүгүҥҥү иллээх, эйэлээх олохпут бөҕө акылаата буолбут албан ааттаах бойобуой дьайыыларынан бэлиэтэммит дойдубут үгүс үйэлээх байыаннай устуоруйатын ытыктыыбыт, урукку кэмнэр дьоруойдарын сырдык мөссүөннэрин өйбүтүгэр-сүрэхпитигэр кэриэстээн илдьэ сылдьабыт.

Биһиги бэйэбитин элбэх омуктаах Россия норуотун быһыытынан билиниибит Аҕа дойду Улуу сэриитин кытары ыкса ситимнээх. Сэрии сылларыгар биһиги дойдубут норуот бүттүүн хорсун быһыытын сүдү уопутун ааспыта. Мөлүйүөнүнэн дьон эрэйи-муҥу көрөн, олохторун толук ууран ситиһиллибит кыайыы – биһиги норуоппут улуу нэһилиэстибэтэ – бу хаһан да умнуллубат!

Аҕа дойдуну көмүскээччи күнэ Ийэ дойдуга сулууспалыырга, Россия норуотун идеалыгар уонна сыаннастарыгар бэриниилээх буоларга көҕүлүүр, дойдуга туһалааҕы оҥорорго кынаттыыр.

Биһиги – кыайыыны ситиспит дьон удьуордарабыт. Устуоруйа бу кырдьыгын өйдөөһүн саҥа ситиһиилэргэ, эйэлээх олоҕу айарга-тутарга биһиэхэ эр санааны, күүһү-уоҕу эптин!

 Саха Өрөспүүбүлүкэтин Ил Дархана Айсен Николаев

Следите за самым важным и интересным в Telegram-канале и WhatsApp-группе ЯСИА