Ат сүүрдүүтэ сахаҕа былыр-былыргыттан улаханнык ытыктанар, кэтэһиилээх-манаһыылаах күрэс былдьаһыыта. Ол сиэринэн атырдьах ыйын 13 күнүгэр Нам сэлиэнньэтин Куонда Кириэс ипподромугар ат спордун федерациятын уонна Нам улууһун дьаһалтатын тэрийиитинэн, Государственнай деятель Илья Винокуров үбүлүөйдээх 120 сылын чэрчитинэн иккис төгүлүн ыытыллар «Эҥсиэли кубогар» алта улуустан сүүрүк аттарын аҕаланнар илин-кэлин түсүһэн дьон сүргэтин көтөхтүлэр.
Ат сүүрдүүтүн үөрүүлээх аһыллыытыгар Нам улууһа МТ баһылыга Александр Атласов, Саха республикатын ил дарханын уонна Правительствотын дьаһалтатын салайааччыта, Саха Республикатын Правительствотын председателин бастакы солбуйааччытын э.т. Юрий Куприянов, Саха Республикатын Ил Түмэн Государственнай Мунньаҕын тутууга уонна сокуоҥҥа бастайааннай комитетын, Нам улууһун ат сүүрдүүтүн федерациятын председателэ Алексей Еремеев, Ил Түмэн депутата Николай Румянцев уо.д.а. атыттар кыттыыны ыллылар. Ат сүүрдүүтүгэр сыраларын уурбут тренердэргэ, ат сүүрдээччилэргэ, бэтэрээннэргэ бэйэлин махтал суруктарын туттартаатылар, сэмэй бэлэхтэрин анаатылар.
Күрэхтэһиигэ аттар 7 дистансияҕа сүүрдүлэр. Ол курдук, 800 м. Анна Арка (Мэҥэ Хаҥалас) бастаата, Альфина (Амма) иккистээтэ уонна Арлекин (Нам) үһүстээт.
Атыыр аттарга 1000 м. Горец (Амма) бастакынан, иккиһинэн Крэк (Мэҥэ Хаҥалас), үсүһүнэн Голден Граф (Хаҥалас), онтон биэлэргэ Мама Мия (Нам) бастакынан, кини кэнниттэн тилэх баттаһа Си Си Кетч (Чурапчы) иккиһинэн биэтэккэ кэллилэр. 1600 (сабыылаах) м. икки ат сүүрбүтүттэн Флоренция Суола (Мэҥэ Хаҥалас) эрэллээхтик бастаата, онтон Гольфстрим (Дьокуускай) кэллэ. 1600 м. (аһаҕас) Ориентир (Нам) бастакынан, иккиһинэн Турбо Дансер (Сунтаар), кини кэнниттэн Дружина (Сунтаар) кэллэ. 2400 м. «Эҥсиэли кубогын» иһин тыҥааһыннаах, ыһыылаах-хаһыылаах, өрөйүүлээх-чөрөйүүлээх киирсиигэ Гоу Стивен (Амма) бастаата, Хевенли Стид (Нам) иккистээтэ, Рокси Алекс (Амма) үһүстээтэ. Уонна 2000 м . Фрут Элли (Амма) бастакы, Рашен Джой (Мэҥэ Хаҥалас) иккис, Санта Люсия (Чурапчы) үһүс миэстэни ыллылар.
Ат сүүрдүүтүгэр биир сонунунан киирии билиэтинэн сыаналаах бириистэри оонньотоннор дьон көҕүн тартылар, хас биирдии бириискэ тиксибит киһи үөрэн-көтөн, илии тутуурдаах, өттүк харалаах дьиэлээтэ.
Ат сүүрдүүтүн тэрээһинигэр ыалдьыттаабыт Юрий Куприянов: «Бүгүн манна чыпчааллар, ат сүүрдүүтүн сэҥээрээччилэрэ тоҕуоруһа муһуннулар. Ат сүүрдүүтүн күрэхтэһиитигэр тренер сыралаах, ситиһиилээх үлэтэ, ат сүүрдээччи сатабыла көстөр. Нам улууһа киэн туттар, республикаҕа биллэр Сергей Ядреев диэн чаҕылхай тренердээххит. Биһиэхэ, сахаларга, өбүгэлэрбиттэн ат сүүрдэр, аты баайар сатабыл олохсуйан хаалбыт эбит. Ону бу күрэхтэһиилэр бигэргэтэллэр. Күнтэн күн саҥа ситиһиилэр, уларыйыылар тахса туралла. Бу күрэхтэһиини тэрийбит Нам улууһун дьаһалтатыгар уонна Намнааҕы ат сүүрдүүтүн федерациятыгар махталбын тиэрдэбин», — диэн санаатын үллэһиннэ.
