РФ Үөрэҕирии ситимин оскуолаларын модернизациялааһын бырагырааматынан үөрэх тэрилтэлэрин саҥардыы, өрөмүөннээһин үлэтэ барар. Бүгүн Улахан Ааҥҥа, М.Е. Васильева аатынан II Малдьаҕар орто оскуолатыгар, өрөмүөн үлэтэ хайдах баран эрэрин билсэ СӨ бырабыыталыстыба бэрэссэдээтэлэ Андрей Тарасенко кэлэ сырытта.
Бу туһунан оскуола дириэктэрин хаһаайыстыбаннай чааска солбуйааччыта Анна Мохначевская редакцияҕа иһитиннэрдэ: — Андрей Тарасенконы улууспут баһылыга Олег Иринеев, нэһилиэкпит баһылыга Александр Алексеев, оскуола дириэктэрэ Григорий Сысоев уонна бэдэрээтчик тэрилтэтиттэн Тимур Омуркулов арыаллаатылар, кэритэ сылдьан туох үлэ ыытылла турарын билиһиннэрдилэр. Өрөмүөҥҥэ көрүллүбүт үбүнэн үлэ 95 бырыһыана толоруллубутун Тарасенко хайҕаата, ситэриллэ илик үлэлэри толорууга кыраасканы, тэриллэри ылыыга эбии харчы бэриллиэ диэтэ. Үөрэх дьылын көрсө оскуола хапытаалынай өрөмүөнэ бүтэр кыахтанна.
Людмила Аммосова
This post was published on 26.07.2023 18:02 18:02